2023-йисуз Дагъустанда, “Хатасуз ва ери­лу рекьер” милли проектдин сер­гьят­ра аваз,  региондин  ва чкадин  важиблувал авай 59,8 километр шегьре рекьер кутугай гьалдиз хкун, гьакIни улакьрин заланвал ва чIехивал ахтармишдай автоматламишнавай 2 пункт туькIуьрун пландик кутунва, хабар гузва чаз РД-дин транспортдин ва рекьерин майишатдин министерстводин пресс-къуллугъди.

Санлай къачурла, РД-дин  жуьреба-жуьре программайрин сергьятра аваз, 228 километр — региондин ва 250 километр муниципальный шегьре рекьер ремонт авун пландик кутунва. Идакай РД-дин транспортдин ва рекьерин майишатдин министр Жамбулат Салавова 26-28-апрелдин йикъара Казанда кьиле фейи  Федеральный рекьерин агентстводин илимдинни тежрибадин “Россиядин Федерациядин субъектрин мулкунал рекье­рин кIвалахар кьилиз акъудунив эгечI­дай нетижалу рекьер” конференциядал лагьана.

2023-йисуз уьлкведин регионрин вилик  шегьре рекьерин асул сетрал авуна­ кIанзавай кIвалахрин вири куьлуь-шуьлуьяр,  гьар са региондин кьетIенвал  ва агьалийрин игьтияжар фикирда кьуна, мад сеферда ахтармиш  хъувунин мес­эла эцигнавай. И кардин макьсад неинки вилик эцигнавай месэлаяр гьялун, гьакIни хьанвай агалкьунар хуьн я. И кIвалахдин нетижайралди уьлкведин вири субъектрин рекьерин сетра вад йисан къене тамамарна кIанзавай кIва­лахрин программаяр цIийи хъувунва. ИкI, къенин юкъуз Дагъустан Республикадин  шегьре рекьерин асул сетрин яргъивал 357,9 километрдиз барабар я. Адак региондин важиблувал авай рекьерин 12 участок акатзава ва ам асул 2 лишан фикирда кьуна туькIуьрнава — игьтияжлувал ва алакъалувал.

Малум хьайивал,  игьтияжлувилин лишан фикирда кьуна, региондин 102,8 километр шегьреяр хкянава. Иник аэропортунив ва автомашинар ахъайдай меж­дународный пунктарив агакьарун таъминарзавай рекьер  акатнава. Кьвед лагьай, яни алакъалувилин лишан кваз кьуна, региондин важиблувал авай ва, санлай къачурла, 255,05 километрдиз барабар тир, субъектрин меркезар ­(Махачкъала-Грозный)  федеральный важиблувал авачир рекьерай алакъалу хьун таъминарзавай участокар хкянава.

Къейд авун лазим я хьи, региондин важиблувал авай шегьре рекьерин асул сетрин арада кутугай гьалда анжах 214,4 километр (59,9%) рекьер ава. 2028-йис алукьдайла, и делил 85 процентдив агакьарун  лазим я.

Дагъустанда, шегьре рекьер ремонт авунин планар туькIуьрдайла, кьетIен фикир яшайиш патал важиблу объектриз: медицинадин ва образованидин ида­райриз, гьакIни  дагълух чкайра хуьрер алакъалу ийизвай   рекьериз гузва.

Алай йисуз ремонт авун патал вилик эцигнавай асул объектрик  “Грозный-Ботлих-Хунзах-Аракандин майдан” шегь­ре рехъ (196-217 лагьай ки­лометр­дин­ мензил) ква. И участок РД-дин  транспортдин ва рекьерин майишатдин  ми­нистерстводин госпрог­раммадин сер­гьятра аваз ремонт ийизва. Мад са объ­ект — “Махачкъала-Буйнакск-Леваши-Ви­ни Гуниб” шегьре я.  Ина 11 километрдин  участокда шегьре гегьеншарда.

Федеральный сетрални гегьенш май­данра аваз ремонтрин кIвалахар тухудайвал я. Санлай къачурла, 78,1 кило­метр­дин яргъивал алай и участокда рехъ кьуд зулунив агакьдайвал гегьен­шарда. 2023-йисуз ина 36,9 километрдин мензил ишлемишиз вахкун пландик ква.

Амина Муслимова