Са тIимил йикъар идалай вилик Махачкъалада, Шииратдин театрда, Вирирос­сия­дин литературадин (“И в каждой книге мир неповторим”) килигунин-конкурсдин нетижаяр кьуниз ва гъалибчийрив шабагьар вахкуниз талукьарнавай шад мярекат кьиле фена. ЦIи и конкурс Дагъустандин халкьдин шаир Расул Гьамзатован 100 йисан юбилейдиз бахшнавай.

Н.Юсупован тIварунихъ галай Рес­публикадин аялрин библиотекади теш­килнавай литературадин и конкурсдиз аялри чпин кIвалахар алай йисан 1-февралдилай рекье тваз башламишнавай. Жюриди чпин устадвал къалурун патал 200 жаванди рекье тунвай кIвалахриз ­къимет гана. Гъалиб хьайибурун жергедай яз, финалдиз 15 аял акъатна. Абурун арада СтIал Сулейманан райондин Экенрин хуьряй тир, юкьван школадин 10-классда кIелзавай Зулейха  Къафаровани  авай.

Конкурсда гъалибвал къазанмишай аялриз талукь дережайрин дипломар, грамотаяр ва сертификатар гана.

*** 

Дагъустандин халкьдин шаир Р.Гьамзатован 100 йисан юбилейдиз талукьарнавай Вирироссиядин яратмишунрин кон­курс­дин нетижаяр кьуниз талукьарнавай мярекат и мукьвара Каспийскда Республикадин образованидин центрадани (РЦО) кьиле фена.

“Къуй къени гафуни руьгь ахварай авудрай…” лишандик кваз гьар йисуз тешкилзавай и конкурсдин макьсад аялрин ва жаванрин фикир урус, хайи ва ингилис чIа­ларал желб авун, яратмишунрин рекье чпин устадвал ахтармишзавай аялар майдандиз акъудун, абуруз куьмекар гун я. Ам 10-20 йисарин яшда авай аялрин (бедендин мумкинвилер сергьятламиш хьанвай аялривайни чпин алакьунар къалуриз жезва) арада са шумуд номинациядай кьиле тухузва. Жюридик Дагъустандин халкьарин дидедин, урус ва ингилис чIаларин муаллимар, писателар, шаирар, журналистар ква.

Шадвилелди а кардикай хабар гуз кIан­зава хьи, конкурсдин “Шиират” номинация­да (16-20 йисара авай аялрин арада) СтIал Сулейманан райондин Эминхуьруьн юкьван школада кIелзавай  Исмаил  Имамов  1-чкадиз лайихлу хьана.

Чаз жаванрихъ мадни еке агалкьунар хьана кIанзава.

Чи мухбир