И йикъара Нальчикда боксдай СКФО-дин кIвенкIвечивал къазанмишун патал кьиле фейи акъажунра 13-14 йисара авай 250-далай виниз жаванри заланвилин 16 жуьредай чпин гъутарин къуватар къалурна. Санлай Дагъустандин хкянавай командади 1-чка кьуна. И гъалибвал къазанмишуник лайихлу пай кутурбурун арада чи ватанэгьли, машгьур боксёр, вичин ери-бине СтIал Сулейманан райондин КIварчагърин хуьряй тир Имам Сейфулаевни (57 кг) авай.
Райадминистрациядин пресс-къуллугъди чаз хабар гайивал, ЧIехи Гъалибвилин суварин вилик квай юкъуз райондин кьил Саид Темирханова Имам Сейфулаеваз, СКФО-дин кIвенкIвечивал патал акъажунра буьруьнждин медаль къазанмишай Артём Агъамегьамедоваз ва абурун тренер-муаллим Альберт Межидоваз къазанмишнавай агалкьунар тебрикна, районда спорт вилик тухуник лайихлу пай кутазвайди къейд авунихъ галаз сад хьиз абурув чухсагъулдин чарар вахкана.
Тренердин ва адан гъилик вердишвилер къачузвай жаванрин тIварцIихъ чими келимаяр райондин кьилин заместитель З.Къагьриманова, райондин спортдин, туризмдин ва жегьилрин крарин рекьяй комитетдин директор Ч.Абдулмежидовани лагьана. Абурухъ гележегда спортдин мадни чIехи кукIушар муьтIуьгъардай къуватар хьун алхишна.
Чпин нубатдай тренерди ва жаванри вилик квай акъажунрикай, гележегдин планрикайни суьгьбетна. Спортдал машгъул жедай къулай шартIар тешкилунай ва куьмекар гунай райондин кьиле авай ксариз сагърай лагьана.
«Лезги газет»
