7-майдин йифиз Америкадин Нью-Джерси штатда какахьай единоборствойрай кьиле фейи UFC 288 турнирда (дебютдин бягьсина) машгьур спортсмен, вичин ери-бине Кьасумхуьрелай тир Икрам Алискерова, америкави Фил Хоус сифте раундда нокаутдиз ракъуруналди, инанмишвилелди гъалибвал къазанмишна. Аферин!
РикIел хкин: алатай йисан сентябрдиз Dana White’S Contender Series турнирда бразилви М.Сузадал кимура — гъилиз тIарвал гудай къайда — ишлемишуналди гъалибвал къазанмишунай чи ватанэгьлиди UFC-диз — какахьай единоборствойрай бягьсер тухунал машгъул жезвай спортдин виридалайни чIехи ва кесерлу тешкилатдиз (США-дин Лас-Вегасда кардик ква) кам къачунай.
Икраман 30 йис я. Ада хайи хуьре стхаяр-чемпионар тир Къурбановрин гъилик сифтегьан вердишвилер къачуна. Эхиримжи йисара ада Махачкъалада, гьакIни Америкада вичин устадвал хкажзава. Ф.Хоусахъ галаз кьиле фейи бягьсиниз ада хайи республикада гьазурвал акуна.
Чи ватанэгьлиди какахьай единоборствойрай “чIехи спортда” вири санлай 14 гъалибвал къазанмишнава. Баркалла, вахъ мадни чIехи агалкьунар хьурай, Икрам!
Рагнеда Рамалданова
