Рамазандин варз куьтягь хьана. Шаввалдин вацран сувабдин сиверни хвена акьалтIарайдалай гуьгъуьниз Мегьарамдхуьруьн райондин имамрин председатель Алихан Сефиханова, и варцара активнидаказ кIвалахна лагьана, райондин имамрихъ галаз ял ягъунин шар-тIара гуьруьш тешкилна.
И мярекат тешкилуникай ада виликамаз райондин мергьяматлувилин «Инсан» фондунин регьбер Мурад Гьамидовахъ галаз меслятар авунвай. Гуьруьшдин ниятни гележегда Аллагьдиз ибадат авуниз къуватар кIватIун тир. Пайгъамбардин (Аллагьдин патай салават ва салам хьуй вичиз) гьадисда лагьанвайвал, амалриз, ниятриз килигна, суваб гуда.
Мярекат тешкилунин карда винидихъ тIварар кьурбуруз карчи Изамутдин Юзбеговани куьмекар ганвай. Ада вичин хайиди тир Къурукал хуьре авай аялрин санаторийдин къаншарда тепедал алай, ял ягъун патал вири шартIар авай кIвал мярекат тухун патал тешкилатчийрин ихтиярда вуганвай.
Пайгъамбардин (Аллагьдин патай салават ва салам хьуй вичиз) са гьадисда лагьанва хьи, мусурман инсан гьар са карда — ибадатда, кIвалахда, кIелунра, ял ягъуна вилик жергейра хьана кIанда. Са риваятда ахъайзава: Пайгъамбарди (Аллагьдин патай салават ва салам хьуй вичиз) вичин асгьабарни галаз чуьлда ял язавай. Сада лапаг тукIвазвай, сада яд гъизвай, сада къажгъанар эцигзавай. Пайгъамбарди (Аллагьдин патай салават ва салам хьуй вичиз) тадиз фена, цIамар кIватIиз гьерекатна. Асгьабри лагьана: “Я Пайгъамбар (Аллагьдин патай салават ва салам хьуй вичиз), вун вучиз кIарасар кIватIиз физва? Чавай жедачни а кIвалах ийиз?”. Ада лагьана: “КIвалахдик квачир садни хьана кIандач”.
Мярекатдин иштиракчийри Филерин хуьруьн имам Абдурагьман гьажиди, Къурукаларин хуьруьн имам Керим гьажиди ва и цIарарин авторди ахъаяй гьадисрихъ, нашидрихъ яб акална.
Имамрин гьуьрметдай ихьтин гуьруьш тешкилайбурулай Аллагь рази хьурай!
Сулейман Пашаев
