Вахтуниз санал акъвазун хас туш, ада гьамиша виликди еримишда. Идахъ галаз санал вири хилера дегишвилерни кьиле фида. Гьатта къурулушарни дегиш жеда. Къе СтIалрин кьилихъ галай паласада кутунвай багълар, къелемар гьасилдай къелемлухар, кIвалахдик квай инсанарни техника акурла, са 10-15 йисан вилик паласа валарини тамари, чмуррини цагъамри кьунвай, ничхирри агъавал ийизвай чка тир лагьайла, гзафбур агъун тавунни мумкин я. Эхь, инсандин кIвач хкIун тавур паласа къе генг багълари кьунва.

РД-дин Гьукуматдин Председатель Абдулмуслим Абдулмуслимов кьиле аваз региондин гьукуматдин делегация 14-апрелдиз СтIал Сулейманан райондиз атайдакай, ­“Полоса” ООО-дин агропромышленный майдандал фейидакай, агрохолдингдин гзаф бегьер гудай багълар кутунин рекьяй инвестпроектар кьилиз акъудзавай гьаларихъ галаз  таниш хьайидакай “Куьредин хабарар” газетдин­ 16-нумрада гегьенш макъала ганва. Алатай гьафте­да чун, райондин информ­агентст­во­дин журналистар, кьиле анин руко­водитель Гу­ле­ра Камилова аваз, мад сеферда агрохолдингдин майдандал фена. И кардихъ себеб авай: аниз Дагъустандин Огни ше­гьер­дин­ аграрный колледждин студентар атан­вай­.

Сифте чун “Полоса” ООО-дин кьилин пе­шекаррихъ  галаз гуьруьшмиш хьана. Карханадин кьилин инженер Александр Рыжова чаз лагьайвал, ООО-дихъ ичин адетдин ва гзаф бегьер гудай шуьмягърин ва маса 2500 гектар багълар, къелемлух ава. Ина кьилиз акъудзавай инвестпроект Россиядин Федерацияда чIехи­бу­рукай сад я. Пландик 50 агъзур тонн емишар хуьдай чка эцигун, кьилиз акъуддай маса крарни ква.

— Чи агрохолдингда хъсан пешекаррихъ игьтияж ава. Гьавиляй чна къе карханадиз аграрный колледждин студентриз теклифнава, — давамарна А.Рыжова. — Чна маса колледжрин ва хуьруьн майишатдин институтрин студентризни теклифда, чи кIвалахар, багълар, техника къалурда. Инанмиш я хьи, абурукай гзафбур кIелунар акьалтIа­райла, кIвалахиз чи агрохолдингдиз къведа.

Чун ихтилатрик кумаз, Дагъустандин Огни шегьердин аграрный колледждин эхиримжи курсуна кIелзавай 35 студентни атана­. Абур “Полоса” ООО-дин пешекарри хушвилелди кьабулна. Атанвайбур асул гьисабдай эксплуатациядин ва механизациядин факультетда кIел­завай студентар тир. Абурухъ галаз агрохолдингдин мехпаркда гуьруьш кьиле фена.

А.Рыжова студентриз ихтилат авурвал, инвестицийрин чIехи проект кьилиз акъудзавай карханадихъ 15 машин махсус техника ва 70 трактор ава. Асул гьисабдай техника къецепатан уьлквейрай къачунвайди  я. Тракторри ва хуьруьн майишатдин агрегатри алай аямдин истемишунриз жаваб гузва. Ихьтин тракторар идара ийидай, абурал кIвалахдай хъсан пешекарарни герек я.

Кьилин инженерди студентриз Индиядин «SOLIS» маркадин  алай аямдин, вири истемишунриз жаваб гузвай цIийи трактор къалурна. Инженерди лагьайвал, гъвечIиди ятIани, и трактордалди агротехникадин гзаф  серенжемар тамамариз жезва. Ада компьютеррин куьмекдалди кIвалахзава. Ам идара ийизни регьят я.

Александр Рыжова студентриз агрохолдингдин гележегдин планрикай, кIвалахри­кай, шартIарикай, мажбурнамайрикайни гегьенш рахунар авуна, абурун суалриз жавабар гана.

Аграрный колледждин студент Эльман Гьажимурадова трактор гьалайдалай гуь­гъуь­низ вичин шадвал чуьнуьхнач.

— Заз “SOLIS” трактор лап бегенмиш хьана. Адан кабина иномарка машиндиндалай кIусни усал туш, — лагьана Э.Гьажимурадова. — Зун Агъа СтIал-Къазмайрилай я. Жу­ван хайи районда ихьтин проект кьилиз акъудунал зун шад я. Колледж акьалтIарна, зун иниз трактордал кIвалахиз хкведа. Практикада авайлани, пул гузва, мажибарни екебур я. За жувахъ галаз кIел­завай студентризни иниз кIва­лахал атуниз эвер гузва.

Заз агропромышленный майдандал Да­гъустандин Огни шегьердин аграрный колледждин директор Маркизат Сулеймановадихъ галаз таниш жедай ва адаз са шумуд суал гудай мумкинвал хьана.

— Чи колледжди хуьруьн майишатдин карханаяр патал автомеханикар, хуьруьн майишатдин производстводин мастерар, гегьенш профилдин механизаторар ва слесарар гьазурзава, — лагьана М. Сулеймановади. — Колледждихъ Белиждин поселокда ва къадим Ахцегьрин хуьре филиалар ава. Колледжда 604 студентди кIелзава. Чи студентриз агрохолдингдин майдандал теклифунай, зурба про­ект кьилиз акъудзавай ва кIвалахар кьиле­ тухузвай гьалар къалурунай инвестордиз ва карханадин кьилин пешекарриз чухса­гъул лу­гьузва чна. Зун инанмиш я хьи, чи кол­лед­ж­ куьтягьайбуруз ина кIвалах жеда. Чаз акур­вал, ина кIвалахдин шартIар къулайбур, техника цIийи­ди, алай аямдин истемишунриз жаваб гузвайди я. Ихьтин карханада кIва­лахун гьар са пешекардиз бегенмиш жеда.

Чи ихтилатрик колледждин Белиж поселокдин филиалдин заведующий Къазимегьа­мед Абдурагьмановни экечIна.

— Эхиримжи йисара СтIал Сулейманан район гьам социальный, гьамни экономикадин рекьерай вилик фини, инвестицийрин проектар уьмуьрдиз кечирмишуни, багъларин ва уьзуьмлухрин майданар йисалай-суз гегьеншаруни гьар са касдин гуьгьуьлар хкажзава, — лагьана Къ. Абдурагьманова. — Вири и крар себеб яз, инсанриз, иллаки жегьилриз, чкадал кIвалах жезва. Патарал физ, яргъал шегьерра кIвалахиз кIанзавай жегьилар хайи ерийрал аламукьзава. Имни разивал ийиз же­дай кар я. Кьиблепатан Дагъустанда ихьтин проект кьилиз акъудун баркалла къведай кар я. Чи филиалда кIелзавай са шумуд гададихъ гележегда и карханада тракторрал кIва­лахдай фикир ава. И кардални чна шадвалзава.

Чун шагьид хьайивал, Дагъустандин Огни шегьердин аграрный колледждин преподавателар ва студентар агрохолдингдин агропромышленный майдандилай рикIера разивилин, шадвилин гьиссер аваз хъфена. Инанмишвал ийиз кIанзава хьи, колледж акьалтIарайдалай гуьгъуьниз уьлкведа зурбабурукай сад тир инвестпроект уьмуьрдиз кечирмишзавай агрохолдингда чпин зегьметдин рехъ давамардайбур гзаф жеда.

Хазран  Кьасумов