И йикъара Каспийск шегьердин майдандал “Гъалибвилин пайдах” лишандик кваз кьиле фейи акцияда  РД-дин Кьилин Администрациядин, Гьукуматдин векилри, Ватандин ЧIехи дяведин ва далу патан фронтдин иштиракчийри, образовани­дин, культурадин, искусстводин деятелри, воен­ный частарин офицерри, аскерри, кадетри, школь­никри, жемиятдин тешкилатрин векилри иштиракна.

Дагъустан Республикадин Гьукуматдин Председателдин заместитель Рамазан Жафарова региондин Кьилин, Гьукуматдин ва  вичин тIварцIи­хъай кIватI хьанвайбуруз Гъалибвилин 78 йис тебрикна.

Мярекатдин иштиракчийрин вилик Украинадин миллетбазрихъ галаз викIегьвилелди женг чIугвазвай пуд стхадин диде Зубейжат Гьамзалаева экъечIна.

— Чи рухваяр, стхаяр Гитлеран фашистрал гъалибвал къачур бубайрин несилар я. Къе абурун вилик мад гьа везифа акъвазнава — Украинада кьил хкаж хъувунвай фашистар, бандерачияр терг авун.  И карда зи рухвайрини иштиракунал за дамахзава. ГьикI лагьайтIа, Ватан, хизан, ислягь уьмуьр хуьн гьар са инсандин буржи я. Чи халкь гьакI вердиш хьанвайди я ва къе Россиядин халкьди душман дарбадагъзавай армиядиз куьмек гузва. Ихьтин ватанпереслу кар ийизвай гьар садаз за сагърай лугьузва. Чи мурад сад я — чи рухваяр, стхаяр, багърияр сагъ-саламатдиз гъалибвал гваз хтун.

Гъалибвилин пайдахдин таъсирдикай, фа­шист­рикай чи хуьрер, шегьерар, къе Россиядиз акси акъ­вазнавай Европадин уьлквеяр азаддайла, Яру Армияди къалурай кьегьалвилерикай, тарихдин тарсар рикIелай алуд тавуникай гьукуматдин, жемият­дин, жегьилрин тешкилатрин векиларни  рахана.

Абад  Азадов