Малум тирвал, виликдай агьалийриз пенсияр, яшайишдин хилен маса пулар, дидевилин капитал, аялриз пособияр гунал са фонд — Пенсийрин, гьукуматдин кIвалахал алай инсан азарлу хьуниз, вахтуналди зегьметдиз къабил туширвилиз килигна (больничный), дишегьли кIвачел залан хьунихъ, аял хунихъ галаз алакъалу, реабилитациядин такьатар (ТСР), курортризни санаторийриз путёвкаяр гунал муькуь фонд — Яшайишдин страхованидин — машгъул жезвайди тир. Алай йисан 1-январдилай кьве фондуникай сад — Яшайишдин фонд — хъувурдалай кьулухъ республикадин агьалийрик къалабулух кутазвай суалар кьери жезвач. “Лезги газетдин” почтадиз къвезвай, мукьвал-мукьвал тикрар жезвай (абурукай чна виликдайни ганватIани) суалар, месэлаяр мукьвара чна Россиядин Яшайишдин фондунин Дагъустанда авай Отделенидин управляющий (Дагъустандин Яшайишдин фондунин регьбер) Мегьамед Исаевахъ галаз мад сеферда веревирдна.
— Яшайишдин фондунин Дагъустанда авай муьштерийрихъ галаз кIвалахдай къуллугъриз гьар юкъуз 2500-далай виниз арзаяр къвезва. ИкI, алай йисан алатнавай варцара чи республикада 260 агъзурдалай виниз къуллугъар кьилиз акъуднава. Идалайни гъейри, гзаф къуллугъар проактивный къайдада (автоматически), яни агьалийрин арза галачизни (кьилди къачуртIа, дидевилин капитал, СНИЛС) тайинарзава. Бязибур патал анжах са арза бес жезва. Гзаф вахтара амни арада мензил аваз, яни кIваляй къецел экъечI тавуна, электронный кабинетдин куьмекдалди вугуз жезва. Гьа и къайдада кьилиз акъудиз жезвайбурук 2023-йисан 1-январдилай гуз эгечIнавай сад тир (единое) пособие акатзава. Тикрар хъийин: ам патал арза “Госкъуллугъар” порталда гуз жеда. Агьалидилай арза атайла, Россиядин Яшайишдин фондунин Дагъустанда авай Отделенидин къуллугъчийри республикадин талукь органривай ва организацийривай, ведомствойри сих алакъада аваз кIвалахунин сергьятра аваз, лазим документар чпи къачузва. Анжах кьилдин дуьшуьшра са гьихьтин ятIани делилар (агьалидин яшайишдин гьалариз талукьбур), эгер гьукуматдин информациядин къурулушда гьатнавачтIа, абур агакьарна кIан жезва.
Мегьамед Исаевич, “Лезги газетдин” почтадиз агьалийрилай мукьвал-мукьвал къвезвай суалрик акатзава: эгер сад тир пособие гуникай хизандиз отказнаватIа, вуч авун лазим я? Мад сеферда арза вугана кIанзавани, тахьайтIа, садра отказ авур дуьшуьшра ам хгуникай хийир авачни?
— Сад тир пособидик, тIварцIяйни аквазвайвал, са шумуд, яни 5 выплата акатзава. Лугьун хьи, гьеле 2022-йисан 1-январдилай чи фондуни акьван чIавалди агьалияр яшайишдин рекьяй хуьдай органри ва Рострудди тайинарзавай са жерге куьмекар (яни пулдин выплатаяр) агакьариз хьана. Ихтилат россиявийрин, гьа жигьетдай яз дагъустанвийринни, 5 категория патал эвездин пулуникай (компенсация) физва. Алай йисалай мад сад, яни сад лагьай аял патал адан 3 йис тамам жедалди гузвай пособие алава хъхьанва, эгер аял 2023-йисан 1-январдалди дидедиз хьанватIа. И пособие агьалияр яшайишдин рекьяй хуьдай органри тайинарнаватIа, чна ам къачузвай касдин виликан реквизитар хвена, амма гузвай вахтунда дегишвилер гьатнаваз (яни февралдин пул — мартдиз, мартдинди — апрелдиз ва икI мад), хгун хъийида.
Эгер хизанда сад лагьай аял дидедиз 2023-йисан 1-январдалди хьанватIа, амма диде-бубади и пул къачун патал документар гьеле туькIуьрнавачтIа, абуру Яшайишдин фондуниз арза вугана кIан жеда. Амма аял алай йисуз ханвайди ятIа, хизандиз пуд йисалди гузвай пособие (от 0 до 3 лет) къвезвач, яни сад тир пособие туькIуьрун лазим я. Тикрар хъийин: сад тир пособие чпе 17 йисал къведалди яшарин аялар ва анжах тIимил доход авай хизанриз, гьакIни медицинадин идарада фад, яни 12 гьафте жедалди, учетда акъвазай кIвачел залан тир дишегьлийриз гузва.
Сад тир пособие тайинарун патал хизандивай арза гзаф сеферра вугуз жеда. Амма цIийи арза виликдай ракъурнавай арзадиз талукь яз къарар акъудайдалай, яни адаз талукь органар килигайдалай, ахтармишайдалай кьулухъ вугана кIанда. Амма… Эгер сад тир пособие тайинарун патал арза ганватIа ва ам гуникай отказнаватIа, важиблуди и кардин себеб я. Эгер ам тагунин себеб хизандин доход къалурзавай делилар бес тахьун ва я дуьзбур тахьун ятIа, лазим делилар вахтунда гьазур хъувун, арза мад сеферда хгун лазим я. Эгер себеб хизандин доход тIимилди туштIа ва я хсусиятда авай эменниди (мисал яз, кIвалер, машинар…) тайинарнавай уьлчмейриз жаваб гузвачтIа (мисал яз, кьве кIвалер, кьве машин аватIа…), тади гьалда мад арза хгунин лазимвал авач. Ахьтин хизанри чпин хсусиятда авай эменнидиз, мажибдиз ва икI мад доходдин кьадардиз талукь яз дегишвилер жедалди, арза гуникай хийир авач. ГьикI хьи, хизан тIимил доход къвезвайбурук акатзавач.
Дагъустанвияр патал важиблу мад са месэла дидевилин сертификатриз талукьди я. Эхиримжи вахтара гзафбуру адан такьатар аялри чирвилер (образование) къачун патални ишлемишзава. Мадни чи ватанэгьлийри гьихьтин рекьериз адакай гзаф менфят къачузва?
— Дугъриданни, 2007-йисан 1-январдилай дидевилин сертификатар гуз башламишайдалахъ инихъ, адан кьадар хьиз, такьатар ишлемишдай рекьерни артух хьанва. ИкI, алатнавай йисара дагъустанвийрин 370 агъзур хизанди ам къачунва.
Дидевилин капиталдин такьатар алай йисан алатнавай варцара дагъустанвийрин 79 хизанди аялрин образование патал ишлемишнава. Санлай вири Россияда — 68,7 агъзур хизанди. Алай йисуз 17 процентдилай виниз хизанри адакай иллаки образование патал менфят къачудайвал я. РикIел хкин: дидевилин сертификатдин такьатар хизанда авай гьи аял патал хьайитIани ишлемишиз жезва. Образование къачуниз хьиз, кIелзавай девирда общежитидин къуллугърайни пул адан гьисабдай гуз жезва. ГьакIни — аялдихъ гелкъуьниз, аялрин бахчадизни.
Малум тирвал, 2020-йисан 15-апрелдилай дидевилин сертификат арза вугун тавуна, яни ЗАГС-дин госреестрдай гузвай делилрал асаслу хьуналди, гузва. Гаф кватай чкадал лугьун хьи, гьа и жуьреда СНИЛС-ни къачуз жезва (икI ам къачунвайбурун кьадар 321 агъзурдав агакьнава). Аялдиз СНИЛС дидевилин капитал, яшайишдин выплатаяр, ОМС-дин полис къачун, поликлиникадихъ галкIурун патал лазим къвезва. ЧIехибуруз — кIвалахал акъвазун ва пенсия тайинарун патал.
Дидевилин сертификатар Дагъустанда чIехи пай хизанри яшайишдин шартIар хъсанарун ва кIвал маса къачун патал ишлемишзава.
Чи фикирдалди, фондар сад авуни агьалийрив къуллугъар агакьарунин карда кьезилвилер тунва…
— Шаксуз. Кьве фонд — пенсийрин ва яшайишдин страхованидин — сад авунин кьилин метлеб агьалийриз къулай хьун патал я. Икьван гагьди кьве фондуна кьилиз акъудзавай къуллугъар — пенсия тайинарун, яшайишдин пособияр туькIуьрун, “больничныйрай” пул гун, реабилитациядин такьатар къачун ва икI мад гзафбур — гила сана, са гъилди, гьакI арада мензил авазни кьилиз акъуддай мумкинвал хьанва.
Рагнеда Рамалданова