Вич жагъуриз куьмекна
Хасавюрт райондин 46 йисан яшда авай агьалиди вичин машин чуьнуьхнавайдакай полициядиз арза авуна. Агьалидин гафаралди, алай йисан 24-апрелдиз малум тушир касди Хасавюртда туьквендин къвалав акъвазарнавай адан “ВАЗ-2104” машин чуьнуьхна. Идакай РД-дин МВД-дин пресс-къуллугъди хабар гузва.
Полициядин къуллугъчийриз машин Хасавюртдин Энергетический куьчеда авай са кIвалин патавай жагъана. Абуру куьчедин агьалийривай хабарар кьуна. Са агьалиди, 64 йисан яшда авай итимди, угъривилин шак физвайди жагъурунин карда вичин куьмек теклифна. ИкI, ада патав гвай дараматдал видеогуьзчивилин камераяр кардик квайди рикIел гъана.
Камеради чIугунвай видеодиз килигайла, неинки полициядин къуллугъчияр, гьакI куьмек гайи агьалини гзаф тажуб хьана. Машин чуьнуьхнавайди гьа куьмекчи тир кьван. Итимди ихтилатайвал, машин гьикI чуьнуьхайди ятIа, а кар адан рикIел аламач, гьикI хьи, ам ички хъуникди пиянзавай. Камеради чIугунвай видеодай ада вич акун гьич виливни хвенвачир. Улакь иесидив вахканва.
Лутувал авунай шак физва
24-апрелдиз Избербаш шегьердин полициядин къуллугъчийри 55 йисан яшда авай Махачкъаладин агьалиди (дишегьлиди) авунвай лутувилин делил винел акъудна. Идакай РД-дин МВД-дин пресс-къуллугъди хабар гузва.
Полициядин участковый къуллугъчийри кьил акъуднавайвал, дишегьлиди, гъвечIи туьквендиз фена, анин 41 йисан яшда авай иесидивай лутувилелди 5 агъзур манат пул къачуна.
Силисди малумарнавайвал, лутувал авунай шак фенвайда, вич муьштерийрин ихтиярар хуьнин рекьяй инспектор я, гуя туьквенда алвер авуниз талукь са бязи къайдаяр чIурнавай дуьшуьшар ава лагьана, винидихъ къалурнавай кьадарда пул истемишна. Эгер пул гайитIа, винел акъуднавай чIурувилер такурдай гьисабда. Туьквендин иеси рази хьана.
РикIе чIуру ният авайда хиве кьуна хьи, талукь тир ихтиярар авачиз, ада туьквендин иеси ягъалмишвиле туна ва адавай нагъд пул къачуна. Шак фенвайди вичи гайи зарар эвез хъувуниз мажбур хьана.
«Лезги газет»
