16-19-майдин йикъара Каспийск шегьердин къерехда авай “Анжи-арена” стадиондал Россиядин жинсинин лапагрин ва цIегьерин выставка 23 лагьай сеферда кьиле фида. Идакай чаз РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
И мукьвара РД-дин Гьукуматдин Председателдин заместитель Нариман Абдулмуталибов, хуьруьн майишатдин ва недай суьрсетдин министр Мухтарбий Аджеков ва Федеральный аграрный илимдин центрадин директор Нариман Ниматулаев выставка кьиле тухудай чкадал фена.
“Стадиондин мулкунал выставкадин мярекатар кьиле тухун патал кьилдин майданар чара авунва, абурун карта-схема тестикьарнава. Выставкадиз гъанвай гьайванар жедай, АПК-дин суьрсетдин ва халкьдин художественный сеняткарвилерин ярмарка, гьар жуьре регионрин “гьаятар” ачухдай, культурадин мярекатар тешкилдай чкаяр тайинарнава.
Выставкадин оргкомитетдин векилар вири майданриз килигна, алай чкайрин жигьетдай абурун къулайвал ахтармишна, жуьреба-жуьре информациядин плакатар тайинардай ва выставкадин иштиракчийринни мугьманрин улакьар акъвазардай чкайриз фикир гана”, — хабар гузва министерстводи.
Къейд ийин, Нариман Абдулмуталибова алай вахтунда Минеральные Воды шегьерда кьиле физвай Кавказдин инвестицийрин выставкадин сергьятра аваз тешкилай “АПК-да малдарвилин хел виликди тухун: цIийи мумкинвилер ва месэлаяр гьялиз жедай рекьер” сессияда иштиракна.
Сессия Кеферпатан Кавказдин округда якIун хипехъанвилин хел еримлу авуниз ва и хилез государстводин патай куьмек гунин серенжемар мадни нетижалубур хьуниз талукьарнавай.
Сессиядин официальный паюнилай гуьгъуьниз вице-премьер РФ-дин хуьруьн майишатдин министрдин земеститель Андрей Разинахъ ва хипехъанрин Милли федерациядин президент Харон Амирхановахъ галаз гуьруьш хьана. И гуьруьшдин вахтунда кьетIен фикир Дагъустандин мулкунал сифте сеферда яз тешкилзавай жинсинин лапагрин ва цIегьерин выставка кьиле тухунин месэлайриз гана.
РикIел хкин, жинсинин лапагрин ва цIегьерин выставкада уьлкведин 23 региондай тир хипехъанри иштиракда. Адан кьвед лагьай пай июндин вацра Забайкальедин крайдин Чита шегьерда кьиле фин лазим я.
Чи мухбир
