Урусатдинни Азербайжандин часпардин патав ракьун рекьин Самур-II станция эцигунин нетижада “Север-Юг” участокдай йисан къене тухузвай парарин кьадар 15 миллион тонндив агакьардай мумкинвал жеда. Идакай и йикъара, Минеральные Воды шегьерда кьиле физвай Кавказдин инвестицийрин выставкадин сергьятра аваз, транспортдинни логистикадин къурулуш вилик тухуниз талукьарна кьиле тухвай мярекатдал Дагъустандин Кьил Сергей Меликова малумарна.
Ада къейд авурвал, цIийиз эцигдай Самур-II станцияда кьве уьлкведин часпардилай элячIдай ракьун рекьин пункт кардик кутада. Къенин юкъуз ихьтин пункт Дербент шегьерда ава. ЦIийи пункт, международный стандартар фикирда кьуна, алай аямдин технологиядин тадаракралди таъминардайвал я.
Къейд ийин хьи, и проект “РЖД” ОАО-дин инвестицийрин программадин куьмекдалди кьилиз акъудда.
Чи мухбир
