Дагъустан Республикадин Кьил Сергей Меликов кьиле авай делегацияди Минеральные Воды шегьерда Кавказдин инвестицийрин сад лагьай выставкада иштиракзава. Идан гьакъиндай “Лезги газетдин” редакциядиз РД-дин Кьилин пресс-къуллугъди хабар гана.
Мярекатдин программадин сергьятра аваз элкъвей столар, гуьруьшар, дискуссияр кьиле тухуда. Анрал инфраструктурадиз, агропромышленный комплексдиз, туристрин ва логистикадин хилериз, ЖКХ-диз, энергетикадиз талукь месэлаяр гьялда.
Выставкадин кьилин макьсад Кеферпатан Кавказдин Федеральный округдик акатзавай регионрин мумкинвилерихъ, инвестицийрин проектрихъ галаз танишарун ва субъектрин экономика вилик тухудай цIийи хилер туькIуьрун я.
КIватI хьанвайбуру 6 хилез (агропромышленный комплексдиз, туризмдиз, транспортдиз ва логистикадиз, промышленностдиз, ЖКХ-диз, энергетикадиз, пешекаррин ва карчийрин мумкинвилер вилик тухуниз) талукь веревирдер ийида.
Дагъустандин регьбердин гафаралди, и темаяр регион патал лап кар алайбур я. Абурукай ихтилатар кьиле фидайла, республикади активнидаказ иштиракда.
Выставка кьиле физвай вахтунда Дагъустандин регьбер Федеральный органрин руководителрихъ, чIехи корпорацийрин, карханайрин, ведомствойрин руководителрихъ галаз гуьруьшмиш жеда.
РФ-дин премьер-министр Михаил Мишустинан регьбервилик кваз кьиле фидай СКФО яшайишдинни экономикадин рекьяй вилик финин гьукуматдин комиссиядин заседание жеда.
2-майдиз Дагъустандин Кьил Сергей Меликов “Росагролизинг” АО-дин генеральный директор Павел Косовахъ галаз гуьруьшмиш хьана. Абуру регион экономикадин рекьяй вилик тухунин ва АПК вилик тухуниз талукьарнавай кьезилвал авай лизингдиз талукь цIийи программайрин мумкинвилер веревирд авуна.
Республикадин хуьруьн майишатдин суьрсет гьасилзавайбурухъ галаз санал кIвалахунин алакъаяр гегьеншарунин мураддалди “Росагролизингдини” Дагъустанди чпин арада икьрар кутIуннава. Сергей Меликовани Павел Косова и документдал къулар чIугуна.
— “Росагролизинг” Дагъустан патал умудлу амадаг я, — къейдна Сергей Меликова. — Чна санал кIвалахуни республикадин агропромышленностдин комплекс вилик тухуниз талукь хейлин месэлаяр бегьерлувилелди гьялзава.
“Чаз гьар юкъуз аквазвайвал, Дагъустандин хуьруьн майишатдин пешекаррин, майишатрин арада кьезил лизингдиз талукь программайриз итиж артух жезва. Эгер 2016-йисуз “Росагролизингдай” 11 процентдин кьадарда аваз техника къачунайтIа, шаз и рекъем 55,6 процентдив агакьна. Къе чна кутIуннавай икьрарди чи карханайрин кIвалах мадни вилик тухуда. Хуьруьн майишатдин пешекарри виниз тир бегьерар гьасилда. И кардал чавай дамах ийиз жеда”, — къейдна Дагъустандин Кьили.
“Росагролизингди” 2008-йисалай Дагъустандиз хуьруьн майишатдин 971 машин къачун патал 2 миллиард манат инвестицияр гана. Гележегда республикадихъ галаз санал кIвалахун мадни гегьеншарда. Инвестицийрин чIехи проектрихъ галаз чна Дагъустандин агропром цIийи техникадалди таъминардай гъвечIи проектарни кардик кутада”, — лагьана Павел Косова.
Гьа и юкъуз РД-дин Кьил Сергей Меликов Кьиблепатан Осетиядин президент Алан Гаглоевахъ галаз гуьруьшмиш хьана.
“Кьиблепатан Осетиядин тарих чаз лап мукьвади я. И республикадихъ галаз Кавказдин агьалийрин къени, стхавилин алакъаяр ава. Осетиядин халкьдин тарихда пис делилар чнани жуван дерт-гъам хьиз кьабулзава. Инлай кьулухъни чна стхавилин, дуствилин алакъаяр хуьда”, — лагьана Сергей Меликова.
Алан Гаглоева къейдна хьи, Кавказдин халкьарихъ галаз дуствилин алакъаяр асирра арадал атана. Ада 2008-йисан вакъиаяр, Россиядин армиядин жергейра аваз Кьиблепатан Осетиядин аслу туширвал хуьзвай акьунра дагъустанвийрини иштиракайди рикIел хкана. Гаглоеван гафаралди, гьа вахтунда Дагъустандин агьалийри республикадай катай 250 кас кьабулна, абуруз жуьреба-жуьре куьмекар гана. “Ихьтин дуствилин, стхавилин алакъаяр хуьн, мадни гегьеншарун чи буржи я”, — лагьана А.Гаглоева.
РФ-дин экономикадин рекьяй вилик финин министр Максим Решетников инвестицийрин выставкада ачухнавай Дагъустандин экспозициядиз килигна. Федеральный ведомстводин кьил ва адан заместитель Сергей Назаров РД-дин Гьукуматдин Председатель Абдулмуслим Абдулмуслимова къаршиламишна.
Дагъустандин экспозицияди 85 квадратный метрдин майдан кьунва. Ина республикадиз мадни виликди рехъ ачухдай инвестпроектрихъ галаз танишарзава. Проектрин арада цIийи багълар кутуниз, майваяр, емишар хуьдай гьамбарханаяр, хуьруьн майишатдин хаммал гьялдай карханаяр эцигуниз, шуьшедин кластердиз, туризмдин, транспортдин ва логистикадин хилериз талукьбур ава…
Хийир Эмиров
