МЧС-дин къуллугъчийрин кIвалахда яшайишдин объектрин хатасузвал таъминарунин месэлади важиблу чка кьазва. ИкI, и йикъара СтIал Сулейманан райондин КIварчагърин хуьре кардик квай Гьабиб Аллагьвердиеван тIварунихъ галай бокс вилик тухудай центрада спортдин комплекс цIаяр кьуникай хуьниз талукьарнавай серенжем (ученияр) кьиле фена. Идакай райадминистрациядин пресс-къуллугъди хабар гана.
СтIал Сулейманан райондин ПСГ-дин (пожарно-спасательный гарнизон) къуллугъчийри администрациядин куьмекни галаз тешкилай и серенжемдин макьсад цIаяр кьуникай хуьдай подразделенийрин кIвалах хъсанаруникай, и карда абурун тежриба хкажуникай, санлай гзаф инсанар аваз хьун мумкин тир дараматра чIуру гьалар арадал атай чIавуз тади гьалда куьмек агакьариз алакьунин вердишвални бажарагълувал артухаруникай (ва икI мад) ибарат тир.
КIварчагъа кьиле тухвай серенжем вичин макьсаддив агакьна. ЦIаяр кьуникай хуьдайбурувай вилик эцигнавай везифаяр кьилиз акъудиз, яни шартIуналди тир цIай хкадариз, инсанар къутармишиз алакьна. Эхирдай абуру спортдин комплексдин къуллугъчийрихъ ва жаван спортсменрихъ галаз гъавурдик кутунин, меслятар гунин кIвалахни (инструктаж) кьиле тухвана.
«Лезги газет»
