24-апрелдиз СтIал Сулейманан рай­ондин Кьасумхуьруьн И.Тагьирован тIва­ру­нихъ галай культурадин маканда, лезгийрин игитвилин “Шарвили” эпосдин йи­къаз талукьарна,  шиирар кIелдайбурун муниципальный конкурс кьиле фена, хабар гузва райондин информациядин къуллугъди. Конкурсдин бинеда яратмишунрин рекьяй бажарагълу аялар майдандиз акъудун, гележегда абур литературадинни ху­до­­жест­венный ва эстетикадин рекьяй виликди тухун, мектебра кIелзавай аялар гаф­унин искусстводал желб авун, абуру лезгий­рин милли культурадиз ийизвай итиж артухарун ва хайи халкьдин тарихдални адетрал рикI хьунал гъун ава.

Гьевеслудаказ шиирар кIелунин ис­кусство муниципалитетдин умуми образованидин  мектебрин 7-классра кIелзавай аялри раижна. Конкурсдин иштиракчийриз къимет гудайла,  абурун шиирар кIелунин  бажарагълувал, артистизм ва эсердин бинеда авай фикир-тема ачухариз алакьун гьисаба кьазвай.

Конкурсдин гъалибчияр райондин ИМЦ-дин  методист Назират Азимовадикай, Курхуьруьн, Эминхуьруьн ва Герейханован хуьруьн мектебрин хайи чIалан ва литературадин муаллимар тир Гуьзел Межидовадикай, Жамиля Жигеровадикай ва Раиса Алиметовадикай, гьакIни “Куьредин хабарар” газетдин кьилин редактор Асият Мирзалиевадикай ибарат жюриди хкяна.

Жюридин къарардалди, 1-чкадиз Кьулан СтIалрин школада кIелзавай Мурад Эминов лайихлу хьана. Кьвед лагьай  чка Агъа СтIалрин мектебда кIелзавай Самира Рамазановади ва Кьасумхуьруьн 2-нумрадин мектебдин ученик Саид Бур­жу­мова кьуна. Пуд лагьай чка Цмуррин школада кIелзавай Милана Ражабовади ва Эминхуьряй тир Диана Селимовади  пайна. Гъалибчияр райондин образо­ванидин управленидин грамотайралди къейдна.

Чи мухбир