Дагъларин уьлкве, адан битаввал хуьник, агьалияр савадлубур, гьа жигьетдай яз диндин рекьяйни, хьуник гзаф ксари чпин лайихлу пай кутуна. Гьажи Давуд, Гьасан эфенди, Ильяс Низами, Куьре Мелик, Ярагъ Мегьамед (Мегьамед ал Ярагъи) ва масабур ахьтинбурун жергедай я.
ЦIинин йисуз тарихчийри, динэгьлийри Ярагъ Мегьамед дидедиз хьайидалай инихъ 250 йис тамам хьунин мярекатар тухванва ва и кар давамарзава. ИкI, мукьвара СтIал Сулейманан райондин Курхуьруьн 1-нумрадин юкьван мектебдани чIехи шейхдин уьмуьрдиз бахшнавай мярекат кьиле фена. Аниз мугьманриз, муаллимриз, мектебда кIелзавай аялриз теклифнавай.
Мярекат лезги чIаланни литературадин муаллим Межидова Гуьзела куьруь гаф лугьуналди башламишна. Адан метлебдикай отставкада авай полковник, тарихдин месэлайрал машгъул Магьмудов Масуба куьрелди ихтилатна. Мегьамед ал Ярагъидин сихилдай тир, Алкьвадрилай атай мугьман, Алкьвадар Гьасан эфендидин музейдин директор Гьуьсейнов Гьуьсейна чпин мукьвавал квекай ибарат ятIа, тарихдин делилар галаз ихтилатна. Ада аялриз, муаллимриз Гьасан эфендидин музейдиз атун теклифна, анай мадни цIийи затIар малум жедайдини лагьана. Адахъ вирида дикъетдивди яб акална, адаз суаларни гана.
Гуьгъуьнлай мярекатдал хуьруьн администрациядин кьил Гьажалиев Радик, райондин имам Омаров Гьамид, хуьруьн мискIиндин имам Баталов Шамиль, и цIарарин автор, мектебдин тешкилатчи Шафиева Наима рахана. Абуру Дагъустанда, Кавказда исламдин дин кьабулунин, адан къанунар чирунин, кьиле тухунин карда кьил кутурдини и кар кьилиз акъудайди Мегьамед Ярагъи хьайиди, Имам Шамила адавай тарсар къачурди ва икI мад рикIел хкана, гьакI диндиз талукь маса месэлаярни веревирдна.
Эхирдай мярекатдин тешкилатчийри ислам диндин къанунар чIехи-гъвечIи гьар сада чируниз эвер гана. Абур тербиядиз, михьивилиз, дуствилиз ва маса эдебриз еке куьмек тирдал аялрин фикир желбна. Мярекатдал аялри, Ярагъидиз, Ислам диндиз бахшна, шиирар, таъсирлу эвер гунар кIелна.
Мярекат виридаз бегенмиш хьана, шаксуз, вичин мана-метлебдив агакьна.
Райсудин Набиев,
зегьметдин ветеран
