И йикъара СтIал Сулейманан райондин Сардархуьруьн спорткомплексда дзюдодай республикадин кIвенкIвечивал патал 13-15 йисарин яшара авай жаванрин арада акъажунар кьиле фена. Абур ачухуниз талукьарнавай шад мярекатда сифте гаф райондин кьил Саид Темирханов рахана. Ада республикадин дережадин турнир тухунай РД-дин образованидин ва илимдин министерстводин тIварцIихъ чими келимаяр лагьана.
— Районда спортдин кIвалахдиз екез фикир гузва. Ида акьалтзавай несил ватанпересвилин руьгьдаллаз тербияламишунин, абур сагълам беден авайбур, руьгь хцибур яз чIехи авунин карда куьмекзава. Къе чи райондай 300-далай виниз рухвайри женгинин махсус серенжемда иштиракзава, кьегьалвилер къалурзава. Са шумуд кас гьукуматдин шабагьриз лайихлу хьана. Абурукай гзафбуру еке агалкьунар къазанмишна, — къейдна ада. — Къе завай женгинин халис офицер, хъсан спортсмен рагьметлу Алаудин Бабаеван тIвар дамахдивди кьаз жеда. Адан тIварцIихъ аялринни жаванрин спортдин 1-нумрадин школа янава. Къе за игитдин диде-бубадиз, муаллимриз ва спортшколадин тренерриз чухсагъул лугьузва, къенин турнирдин иштиракчийрихъни агалкьунар хьана кIанзава.
Турнирдин иштиракчийриз тебрикдин келимаяр РД-дин дзюдодин федерациядин вице-президент Юрий Исмаилова, райадминистрациядин спортдин, туризмдин ва жегьилрин крарай комитетдин директор Чингиз Абдулмежидова, ДЮСШ-рин руководителри ва тренеррини лагьана.
Гуьгъуьнлай республикадин шегьеррайни районрай атанвай 150-далай виниз жаван спортсменри заланвилин 9 категориядай бягьсер тухвана. Нетижада турнирда 1-чка СтIал Сулейманан райондин командади кьуна. Турнирда СтIал Сулейманан райондин спортсменар — Замир Магьмудова, Вели Саругъланова — 1, Мукаил Мукаилова, Назим Мейланова — 2, Амир Керимова, Эмир Эмрагьова, Ших Аливердиева, Али Саругъланова, Измир Буржумова, Мегьамед Гьуьсейханова, Фатулагь Султалиева ва Жамал Абдурагьманова 3-чкаяр кьуна. 2 ва 3-чкайриз Къизилюрт шегьердин ва Хив райондин командаяр лайихлу хьана. КIвенкIвечи чкаяр кьурбурун арада Махачкъаладин, Мегьарамдхуьруьн ва Новолак районрин спортсменарни ава.
Турнирда гъалиб хьайи спортсменри гила Россиядин кIвенкIвечивал патал кьиле фидай акъажунра иштиракда.
Хазран Кьасумов
