Алай йисан 21-июндиз Докъузпара райондин актовый залда «Самурский» милли парк тешкилунин жигьетдай жемиятдин яб акалунар кьиле фена. Ана «ВНИИ Экология» ФГБУ-дин директор Сергей Фокина, «Россиядин Кавказ» региональный отделенидин чIехи координатор Роман Мнацеканова, «ВНИИ Экология» ФГБУ-дин илимдинни методикадин руководитель Дмитрий Очагова, Россиядин тIебиатдинни экологиядин министерстводин директордин заместитель Рустам Рабаданова, «Дагестанский» тIебиатдин къурухдин гьукуматдин директор Къурбан Куниева, райадминистрациядин кьилин заместитель, жемиятдин патай яб акалунар кьиле тухунин комиссиядин председатель Салигь Гьажимурадова ва райондин агьалийри иштиракна.
Мярекат С. Гьажимурадова ачухна:
— Докъузпара райондин мулкар акатзавай «Самурский» милли парк тешкилунин жигьетдай къенин юкъуз жемиятдин арада яб акалунар кьиле физва. Чиниз гьа и проектдин руководителар мугьман хьанва. Чпин нубатда абуру «Самурский» милли паркуникай суьгьбетда. ТIалабзава райондин агьалияр куьне и месэлада иштиракун, суалар вугун ва куь фикирар малумарун».
С. Фокина къейд авурвал, Дагъустандин чилерал сад лагьай милли парк тешкилун – им вичин макьсад тIебиат хуьн ва идалай кьулухъ къвезвай несилрал ам агакьарун патал арадал гъанвай чIехи проект я.
— Агьалийрин фикирарни гьисаба кьун, гьуьжет алай месэлаяр веревирд авун, арадал къвезвай суалриз жавабар гун – ибур милли парк тешкилунихъ галаз алакъалу яб акалунрин кьилин макьсадар я, — къейдна вичин рахунра Р. Рабаданова.
Яб акалунрин вахтунда Р. Мнацеканова мярекатдин иштиракчияр халкьдин паркунин проектдихъ галаз тамамдаказ танишарна.
— Россиядин Федерациядин мулкара 105 къурух ва 45 милли парк ава, — лагьана ада. – Милли паркуни кьунвай территорияди 56 агъзур гектар чил ава. Ам чара авунвай кьве кластердиз пайнава: «Самурдин дельта» ва вичик Докъузпара райондин чилер акатзавай дагъдин «Шалбуздагъ». Паркунин территория зонайриз пайда. Ахьтин зонаяр кьуд жеда: къурухдин, кьетIендаказ хуьдай, рекреационный ва майишатдин.
— И серенжемар вири, анжах тIебиат, набататар, гьайванар ва и территорияда авай медениятдинни тарихдин ирс хуьн патал я, — алава хъувуна Р. Мнацеканова.
Мярекатдин эхирдай С. Гьажимурадова мугьманриз ва иштиракчийриз чухсагъулар малумарна.
А. ЭМИРСУЛТАНОВ
