Сирияди Россиядин Т-90 танкунай боевикар яна
Сириядин Арабрин Армияди (САА) Ладжат районда боевикрал гьужумзава. Гьужумдай махсус “Пеленгдин къуват” тlвар алай машгьур кьушунди женгера Россиядин Т-90А танк ишлемишзава. Террористриз гуьлле гузвай видео террористрин крарин мониторингдал машгъул Telegram-каналди раижнава.
Сириядин гьукуматдин кьушунри идалай виликни Алеппо вилаятда женгерин гьерекатар тухудайла, Т-90 танкарикай менфят къачуна. Сирияди военный рекьяй куьмек яз Россиядивай ихьтин дяведин 15 дав агакьна машинар къачунай.
Туьркияди США-дивай…
Туьркияди сифте сеферда яз Америкадин вад лагьай несилдин кьве А-35 истребителар маса къачуна. Идакай Hurriyet Daily News чешмеди хабар гузва. Самолетар вахкунин официальный мярекатар Техас штатдин Форт-Уэрт шегьерда кьиле фида. Гуьгъуьнлай абур Аризонадин ВВС-рин базадал рекье твада. Ина туьркверин летчикар ва техникадин рекьяй кlвалахдайбур патал чирвилер ва вердишвилер гудай серенжемар 2019-йисан ноябрдалди кьиле фида.
Икьрардал асаслу яз, Анкаради виш F-35 истребитель маса къачун герек я. ТАСС-ди малумарайвал, Туьркиядин къецепатан крарин министр Мевлют Чувашогълудин гафарай, сифтегьан самолетар уьлкведив 2020-йисуз агакьда. 19-июндиз США-дин Конгрессдин сенатди Пентагондин 2019-йисан бюджетдиз талукь къанундин проект кьабулна. И документдал асаслу яз, США-дин оборонадин министерство Туьркиядиз яракьар ва маса военный суьрсетар, кьилди къачуртlа, F-35 ракъурунин мумкинвал гуникай магьрум жезва. Идан себеб Анкаради Россиядивай ЗРС С-400 техника маса къачун яз гьисабзава.
F-35 вичихъ гзаф мумкинвилер авай истребитель я. Сифте яз абур 2006-йисуз туькlуьриз эгечlна. Алай вахтунда ихьтин 300 истребитель туькlуьрнава ва абур США-див, Великобританиядив, Израилдив, Италиядив, Норвегиядив, Голландиядив, Австралиядив ва Япониядив вуганва.
170 миллион акъатна
Челябинск шегьердин агьалидиз лотереядай 170 миллион манат акъатна. Идан гьакъиндай “Столото” тешкилатдин сайтди малумарнава.
“Россияда лотереядин цlийи мультимиллионер пайда хьана. “Гослотодин” 347-тираждин гъалибчи Челябинск шегьердин агьали я. И бахтавар инсан гьелелиг пайда хьанвач”, — кхьизва тешкилатдин пресс-къуллугъди.
Гъалибчидин тlвар, адет тирвал, хатасузвал патал гьелелиг раижзавач. Идалай вилик 2018-йисуз лотереядай чlехи такьатар акъатайбурун жергеда Нижний Новгороддин агьали (267 миллион манат), Барнаулдин агьали (232 миллион манат), Твердин областдин агьали (209 миллион манат) ава. 170 миллиондин иеси хьайи челябинви кьуд лагьай чкадал ала. Россияда лотереядай виридалайни гзаф пулдин такьатар 2017-йисуз Сочидин агьалидиз акъатна. Адан кьадар 364 миллион манатдилайни гзаф тир.
Путинни Трамп гуьруьшмиш жеда
Россиядин ва США-дин президентар тир В.Путинни Д.Трамп 15-июлдиз Венада гуьруьшмиш жеда. Идакай Австриядин машгьур Kronen Zeitung чешмеди хабар гузва.
Чешмеди кхьизвайвал, вилик квай гуьруьшдин гьакъиндай веревирдер авунин макьсаддалди са шумуд югъ инлай вилик Венадиз Россиядин ва Америкадин дипломатар атана.
Мадни, Австриядин меркездиз хатасузвилин рекьяй пешекаррин дестени фида. Россиядин президентдин пресс-секретарь Д.Пескова “Хабарар” РИА-диз малумарнава хьи, Путинанни Трампан гуьруьшдин гьакъиндай Кремль гьелелиг са жуьредин малуматарни гуз гьазур туш. “Гьазурвилер акурла, хабарни гуда”, — къейдна ада.15-июлдиз Москвада футболдай дуьньядин чемпионатдин финал кьиле фида. Ана Россиядин регьбер жедани, жедачни, идан гьакъиндай гьелелиг са затlни малум туш. И йикъара Москвадиз милли хатасузвилин рекьяй США-дин президентдин меслятчи Жон Болтон атун мумкин я.
Путинни Трамп 2017-йисан июлдиз Гамбургда кьиле фейи саммитда гуьруьшмиш хьанай. А чlавуз кьве уьлкведин регьберрин суьгьбетар кьве сятдилайни гзаф вахтунда давам хьанай.
Авиациядин гьужум
Россиядин авиацияди Сириядин Кьиблепатан зонада боевикрал гьужумна. Кьилди къачуртlа, цавай авур гегьенш гьужумдик Бусра аль-Харир шегьер акатна. Идан гьакъиндай “Al-Masdar News” чешмеди хабар гузва.
Чешмеди раижзавай делилралди, 23-июндин йифен сятдин 11-даз Россиядин авиация гегьенш ягъунар кьунив эгечlна. Эхиримжи делилралди, гьужум авуникди боевикар алай са шумуд чка тергна. Сириядин яракьлу къуватри уьлкведин мулкар михьунин гьерекатар активдаказ давамарзава, гьа жергедай яз Бусра аль-Харир райондани еке гьужумар авуниз гьазурвал аквазва.
Гьукуматдин кьушунри икьван чlавалди кьуд шегьер боевикрин дестейрикай азад авуна. Россиядин ВКС-ди Сириядин женгерин гьерекатра 2015-йисан 30-октябрдилай иштиракиз башламишна. Сириядин регьбер Башар Асада Москвадивай военный жигьетдай куьмек гун тlалабнай.
Гьазурайди — Куругъли Ферзалиев
