Лезгийрин игитвилин “Шарвили” эпосдин суварин мярекатрин сергьятра аваз и мукьвара Ахцегьа, А.Гъаниеван тIварунихъ галай ДЮСШ-дин залда, РД-дин физкультурадинни спортдин Министерстводин къаюмвилик кваз РСФСР-дин физический культурадин лайихлу работник, азаддиз кьуршахар кьунайни самбодай СССР-дин спортдин мастер Эфендиев Сулейман Абдурагьимовичан тIварунихъ азаддиз кьуршахар кьунай жегьилрин арада республикадин турнир кьиле тухвана.
И акъажунра Кьиблепатан Дагъустандин вири ва Шамил райондин командайрик кваз 2003-2004 ва 2005-2006-йисара хайи жегьил пагьливанри иштиракна.
Турнирда адан себебкар зурба пагьливан ва камаллу агъсакъал Сулейман Эфендиева ва гьакI “Шарвили” эпосдин суварин оргкомитетдин председатель Имам Яралиева, РД-дин физический культурадин ва спортдин министрдин заместитель Зайнал Салаутдинова, Ахцегь райондин кьил Осман Абдулкеримова, Сулейман-Стальский райондин кьил Нариман Абдулмуталибова, РД-дин Халкьдин Собранидин депутат Назим Апаева, Докъузпара райондин кьилин заместитель Салегь Гьажимурадова, СССР-дин лайихлу тренер Сиражудин Эльдарова, РФ-дин лайихлу тренер Эсед Шагьмарданова, спортдин ветеран Рагьим Къараханова, спортдин мастер Шамил Эфендиева, Даггостехуниверситетдин проректор, алим Елена Павлюченкоди, азаддиз кьуршахар кьунай ветеранрин арада Европадин чемпион Къариб Ашуралиева иштиракуни мярекатдин кесерлувал мадни артухарна.
Спортдин сувар, адан иштиракчиярни мугьманар Ахцегьрин къадим чилел тебрикунин гаф рахуналди, Ахцегь райондин регьбер Осман Абдулкеримова ачухна.
— …Чна чи бажарагълу алим ва пагьливан Сулейман Эфендиевал лайихлудаказ дамахзава. Даггосполитехуниверситетда кIвалахиз, ада вичин уьмуьрдин 50 йисалай артух девир республикадин спорт вилик тухуниз, жегьилриз ватанпересвилин тербия гуниз бахшна ва яшлу кьилихъни и кардал машгъул я. Адан гъиликай дуьньяда машгьур цIудралди пагьливанар хкатна. И баркаллу зегьмет гьукуматди “СССР-дин образованидин лайихлу работник”, “РСФСР-дин лайихлу муаллим” гьуьрметдин тIвараралди, Халкьарин Дуствилин ордендалди ва маса наградайралди къейднава, — лагьана О.Абдулкеримова.
— И залдай са жерге зурба пагьливанар акъатна. И гьасиррал зунни пудра экъечIна. Чи баркаллу муаллимдин гьуьрметдай ва тIварунихъ турнир лап вини дережада аваз тешкилнавайбуруз чухсагъул, — лагьана З.Салаутдинова.
Ахпа микрофондихъай Сулейман Абдурагьимовичан тIварцIихъ хуш келимаяр гваз алим ва В.Путинан ихтибарлу кас тир Елена Павлюченко, С.Эфендиеван хтул, зурба пагьливан Шамил Эфендиев ва масабур рахана.
Райондин искусствойрин мектебдин аялри чпин гуьзел кьуьлералди ва Таира Муспаховади вичин манийралди турнирдин иштиракчийрин руьгь-гьевес хкажна. Ахпа гьасиррал турнирдин финалдин бягьсер эгечIна. Нетижада турнирдин чемпионар Р.Ханбалаевакай (32 кг, Рутул), А.Абдурагьмановакай (36 кг, Ахцегь), Къ.Къарабеговакай (38 кг, Мегьарамдхуьр), Гь.Разакьовакай (42кг, Рутул), Н.ТIалибовакай (44 кг, Дербент), Ф.Атахановакай (48 кг, Мегьарамдхуьр), М.Абдулбутаевакай (52 кг, Шамил район), Д.Мирзоевакай (57 кг, Мегьарамдхуьр), М.Магьсумовакай (68 кг, Ахцегь) хьана. Сифтегьан чкаяр кьур вири пагьливанриз медаларни кубокар, дипломарни пулдин премияр гана.
Дашдемир Шерифалиев
