Виликдай са кас рагьметдиз фейила, ам фаракьат авун патал еке зегьметдивди дагъдин рагун къванер гьазурдай. Абур чкадал хкун патал пар чIуг­вадай машин ва са шумуд кас куьмекчияр герек къвезвай. Гила месэла гьялун асант хьанва: Ах­цегь­рин Къуза ва Гуьне патан сурара цементдин махсус плитаяр туь­кIуьр­зава. Абур мягь­кем хьун патал къене арматура твазва. Гуьне па­та и кардал Риза­хан­ Мисрихановни Ра­уф Дагъларов маш­гъул я. Ап­рель ва майдин варцара чIу­гур гьакъисагъ зегь­метдин нетижада абуру сурарин майдандал ихь­тин 400 плита (шикилда) гьазурнава. Икьван къванер гьазурунин кьилин себеб абур къунши хуьрерай къвезвайбурузни маса гун я. Идакди сурарин бюджетдиз къазанжи къвезва ва гьамиша плитаяр гьазурдай мумкинвал жезва.

Гьелбетда, и кардиз металл, цемент ва кьерен шим герек я. Виридан пай квай сурарин месэлаяр гья­луник жедайвал са къуьн кутуна кIани чкадал, шим гъизвайбуру чпин нефсинин къанихвал къалу­ру­­налди, ам багьа къиметрай маса гузва. Им, гьел­бет­да, гьич кутуг тавур кар я. И сеферда ахьтинбурун­ (чпиз-чеб вужар ятIа чир хъжеда) тIварар кьазвач.

Чна умудзава хьи, гележегда гьам шим гъизвай­буру ва гьам экскаватор гвайбуру мергьяматлувилин кардизни фикир гуда. Гьар са касдиз мергьяматлувилин крарай, гузвай хушунин садакьадай Аллагь-Таалади, эвез яз, 10 сеферда артух хгузвай­ди рикIелай алуд тавуна кIанда.

Рагьидин Эминов