“Математикади вичин къеледиз анжах къуватлубурузни жуьрэтлубуруз рехъ ахъайда”, — лагьана А.П. Конфоровича. Зурба, къуватлу математикар лезгийрихъни тlимил авач. Абурукай сад Абдулкъафар Къегьриманович Рамазанов я.
Ада 1981-йисалай Н.Э. Бауманан тlварунихъ галай МГТУ-дин Калугада авай филиалда кlвалахзава. А.Рамазанов 1954-йисуз Хив райондин Кьванцlилрин хуьре дидедиз хьана. Ада Дагъустандин В.И. Ленинан тlварунихъ галай госуниверситет тафаватлудаказ куьтягьна, гуьгъуьнлай аспирантурадик экечlна ва МГУ-да математикадай кандидатвилин диссертация хвена. 2002-йисалай ам “Кьилин математика” кафедрадин заведующий я.
“Ада гузвай предмет лап четинбурукай сад я. Амма алимди чун виридалайни четин затlарин гъавурда хъсандиз твазва. Имтигьанрин вахтунда ада чавай кlевелай истемишда. Студентри адаз гьамиша гьуьрметзава”, — лугьузва А.Рамазанован виликан студентри.
Абдулкъафар муаллимди математика хкягъуниз адан чlехи стхади таъсирна. Адан стха алай вахтунда университетдин математикадин факультетдин декан я.
“50-йисара чи мектебдиз Липецкдин пединститутдай жегьил муаллимар атанай. Аквадай гьалда, образованидиз, дуьм-дуьз илимриз майилвал авунин кьилин себеб гьа муаллимрин тежрибалувилихъни пешекарвилихъ галаз алакъалу я”, — къейднава А.Рамазанова.
Абдулкъафар Къегьримановича тарс гайи студентрин арадай бажарагълу, хъсан чирвилер авай пешекарар гзаф акъатна. Гзаф вахтара студентар А.Рамазанов кьиле авай математикадин кафедрада акъваззава, ина аспирантурадик экечlзава. Алай вахтунда адан кафедрада виликан кьве студентди кlвалахзава ва аспирантурада кlелзава.
“Чирвилер къачузмай кьван муаллим муаллим яз амукьда, чирвилер къачунин кар акъвазарайтlа, адак муаллимвал кумукьдач”, — лагьанай алим К.Д.Ушинскийди.
Абдулкъафар Рамазанова Ушинскийдин келимадал амал ийизва. Ам санал акъваз тавунвай, чирвилерин сергьятар мадни гегьеншарзавай, илимдин деринриз гьахьзавай алим я. Алай вахтунда ада докторвилин диссертациядин винел кlвалахзава. 2012-йисуз “Теория приближений” тlвар алай монография акъудна. 2014-йисуз ада Москвадин МГУ-да кьиле фейи вирихалкьарин конференциядал илимдин доклад кlелна.
Чи нуфузлу алимдин лайихлувилер вичи кlвалахзавай МГТУ-дин Калугадин филиалди ва Москвада авай кьилин вузди гьуьрметдин грамотайралди къейднава. Илимдин рекье чlугвазвай зегьметдиз, кlвалахдин бегьерлувилиз килигна, адаз РФ-дин образованидинни илимдин министерстводи Гьуьрметдин грамота гана.
Абдулкъафар Рамазанова пуд аял тербияламишна. Рушар экономистар я, гада — инженер. Алимди вичин аялривни Бауманский университетда кlелиз туна, алай вахтунда абуру Калугада кlвалахзава.
Абдулкъафар Рамазанова вичин хайи ерийрихъ галаз авай алакъаяр атlузвач, ам гьамиша вичин ватандихъ ялзавай, адакай фикирзавай кас я. “Саки вири уьмуьр Калугада акъатзаватlани, за жуван гъвечlи ватан рикlелай алудзавач. Жуван миресар, хтулар яшамиш жезвай хуьруьз зун гьар гатуз хъфизва”, — лугьузва алимди.
Гьазурайди — Куругъли Ферзалиев
