Шикилдай аквазвай гьайвандиз лап гъвечIи беден авай игрунка лугьузва. Адан кьакьанвал 15 сантиметрдив кьван агакьда, заланвал — 100-120 граммдив. Игрунка Кьиблепатан Америкада, Бразилияда, Боливияда, Перуда ва Эквадорда яшамиш жезва. И маймунри яшайиш кьиле тухун патал тамун, вацIун къерехар, уьленар авай кIачIичIлухар хкязава. Чинеруг ва я маса вагьши мукьув пайда хьайила, игрунка чIарни юзан тийиз акъвазда.
Игрункаяр, гъвечIи жендек авай бязи маса (тамарин, мармозетка) маймунар хьиз, инсанри кьазва ва маса гун патал зоотуьквенра эцигзава. И кар себеб яз, тIебиатда игрункайрин кьадар эхиримжи вахтара тIимил жезва. Идалайни гъейри, къиздирма, цIаярин азар санай масаниз тухузва лугьуз, вилик вахтара гъвечIи маймунар тергзавай.
Игрункадин йикъан чIехи пай вахт ем жагъуруниз акъатзава. ТIуьниз и гьайванри тарарин миже, емишар, хушраканар ва маса гьашаратар ишлемишзава. Бязи вахтара игрункайри гьатта гъвечIи къушарални гъуьрчзава. Амма игрункайрин виридалайни рикI алай ем тарарал жедай шкьакь я.
«Лезги газет»
