Угърияр тайинарна
14-апрелдиз Махачкъаладин Кирован райондин полициядин отделдиз арза гваз меркездин са ресторандин администратор (дишегьли) атана. Адан гафаралди, алатай йифиз малум тушир ксари ресторандин къене дезгедилай 12 агъзур манатдин къимет авай ички ва пIапIрусар чуьнуьхна. Идакай РД-дин МВД-дин пресс-къуллугъди хабар гузва.
Полициядин къуллугъчийри шак физвайбур — 20 ва 25 йисарин яшара авай Махачкъаладай тир кьве агьали (дишегьлияр) — тайинарна ва отделдиз хкана. Абуру чеб ресторандин дараматда таниш ксарихъ галаз хьайидакай ихтилатна. Чуьнуьхунин патахъай виликамаз меслят хьана, абурукай сада са вуч ятIани заказ авуна. Ресторандин къуллугъчи умуми залдай экъечIайла, кьвед лагьай дишегьли, бардин дезгедихъ фена, пул жагъуриз алахъна. Пул жагъун тавурла, ада а патахъ галай дезгедилай ички авай 4 путулка ва пIапIрусрин 2 кьвати къачуна. Идалай кьулухъ а кIеретI тадиз ресторандай экъечIна. Суд-дуван авун патал материал кIватIзава.
Къад йисалай кьуна
Полициядин къуллугъчийри 20 йис идалай вилик къачагъвилелди гьужумай ва рекьиз кIан хьуналди тепилмиш хьайи тахсиркарвал авунай шак физвайди кьуна ва Дагъустандиз хкана. Россиядин СК-дин Дагъустанда авай СУ-ди республикадин 46 йисан яшда авай агьалидиз талукь яз къарагъарнавай уголовный делодай силис тухунин кIвалах акьалтIарна.
Силисди малумарнавайвал, 1998-йисан 17-июндиз вичик тахсир кутунвайди муьштеридин еринда Махачкъала шегьердин М.Гьажиеванни Толстоян куьчейрин пипIел кардик квай “Хлеб” тIвар алай туьквендиз гьахьна, туьквенчи дишегьлидал гьужумна, адал гзаф кьадар хирер-кьацIар авуна. Хирери зайифарай дишегьли чилел ярх хьана. Тахсир кутунвайдаз туьквенчи кьейиди хьиз хьана, туьквенда аваз хьайи 1500 манат пул чуьнуьхна ва тахсиркарвал авур чкадай катна. Амма тади гьаларин серенжемралди ам кьуна, суддинни психиатриядин экспертизадин къарардал асаслу яз, ам РПНД-диз ракъурна. Анай 1998-йисан 25-декабрдиз ам катна. Къад йисалайни гзаф вахтунда тахсир кутунвайди чарадан паспортдалди Калугадин ва Брянскдин областра далдаламиш хьана.
Силисдин управленидин ва Россиядин МВД-дин подразделенийрин къуллугъчийрин саналди тир кIвалахрин нетижада 2022-йисан мартдиз ам кьуна ва РД-диз хкана.
«Лезги газет»
