Яшайишдин икьрар яшайишдин рекьяй хуьнин органри къвезвай къазанжидин кьадар, чпелай аслу тушир себебралди, яшамиш хьунин агъа кIанин кьадардилай тIимил тир ватандашрихъ, хизанрихъ галаз кутIунзава.
Эменни тIимил тир хизанривай яшайишдин икьрардин такьатар парталар, кIвачин къапар, аялриз мектебда герек жедай метягьар маса къачун патал ишлемишиз жеда. Пулунин куьмек гьар вацран пособие хьиз ва я са сеферда гуналди кьилиз акъудзава. Ихьтин мумкинвиликай менфят къачун патал МФЦ-да арза вугуз жеда.
Уьлкведин гзаф регионар яшайишдин икьрардин бинедаллаз кIвалах жагъурзавайбуруз ва я чеб цIийи пешедив вердишарзавайбуруз, гьакIни чпин хсуси кар кьилиз акъудиз кIанзавайбуруз 350 агъзур манатдив агакьна такьатар гуз гьазур я. Яшайишдин икьрар 3 вацралай 12 вацрал кьван муддатда (вахт мадни артухар хъийидай мумкинвал аваз) кутIунзава.
Эменни тIимил тир хизан
Яшамиш хьунин агъа кIанин кьадардилай тIимил къазанжи къвезвай хизан эменни тIимил авай хизанрик акатзава. Субъектда тайинарнавай яшамиш хьунин агъа кIанин кьадар гьисаба кьазва. Малум тирвал, Дагъустанда яшамиш хьунин агъа кIанин кьадардин пул 13081 манатдикай ибарат я.
Эменни тIимил авайбур тайинардайла, хизандин эхиримжи пуд вацран умуми къазанжидиз фикир гузва. Эменни тIимил авай хизан я лагьай справка МФЦ-дай къачуз жеда. Ада агьалийриз яшайишдин рекьяй са кьадар кьезилвилерикай менфят къачудай ихтияр гузва. Справка туькIуьрун патал МФЦ-диз ихьтин документар гваз фена кIанда:
- диде-бубайрин паспортар;
- аялар хайивилин гьакъиндай шагьадатнамаяр;
- эхиримжи пуд вацран къазанжидин гьакъиндай справка (эгер кIвалахзаватIа);
- зегьметдин книжка (эгер идалай вилик кIвалахнатIа ва алай вахтунда кIвалахзавачтIа).
«Лезги газет»
