Рамазандин вацра Дагъустандин жуьреба-жуьре районрани шегьерра мергьяматлувилин хейлин мярекатар кьиле фена. Ихьтинбурукай сад 14-апрелдиз СтIал Сулейманан районда “Там-Там” тIвар алай ресторандани тешкилнавай.
ЦIи пуд лагьай сеферда кьиле фейи и мярекат тешкилнавайбур стIалви карчияр, “Лезги газетдин” амадагар — Мурад Мегьамедкеримовни Разим Пирмегьамедов — тир. Гаф кватай чкадал къейд ийин хьи, абуру гьар сада хайи чIалал акъатзавай газет кхьин патал гьар йисуз редакциядиз 50 агъзур манат пул чара ийизва.
Мярекат асул гьисабдай аялар патал тешкилнавай. Ана СтIал Сулейманан райондин са жерге хуьрерин мектебра 1-5-классра кIелзавай 64 аялди иштиракна. Мярекатдиз теклифнавай мугьманрин арада, тешкилатчийрилай гъейри, “Лезги газетдин” кьилин редактор Мегьамед Ибрагьимов, Агъа СтIалрин хуьруьн юкьван мектебдин директор Феликс Магьмудов, Кьулан СтIалрин администрациядин кьилин заместитель Мирзебег Магьарамов, зегьметдин ветеран Муслим Эльдеров, “Там-там” ресторандин сагьиб Вагиф Исмаилов, Кьулан СтIалрин мискIиндин имам Мугьаммад Рамазанов ва масабур авай.
Мярекат “Лезги газетдин” кьилин редактор Мегьамед Ибрагьимова ачухна ва эхирдал кьван кьилени тухвана. Адан сергьятра аваз аялрин арада М.Ибрагьимовани Кьулан СтIалрин мискIиндин имам Мугьаммад Рамазанова лезги чIалазни Ислам диндиз талукьарнавай конкурсар кьиле тухвана. Аялри анра чIехи гьевесдивди иштиракна. Гъалиб хьайи 14 аялдиз “South heat” фирмадин патай дипломарни 1 агъзур манатдин кьадарда аваз пулдин пишкешар гана. Гъалибчийриз гьа и кьадарда аваз пулдин пишкешар вичин патай СтIал Сулейманан райондин собранидин депутат Максим Алискеровани гана. Идалайни гъейри, мярекатда иштиракай вири аялриз Мурад Мегьамедкеримованни Разим Пирмегьамедован патай рикIел аламукьдай савкьатарни диндин алим Ямин Мегьамедован “Исламдин эдебар, ахлакьар ва дуьаяр”, “ЧIехи гунагьар” ктабарни багъишна.
Саки 2 сятда давам хьайи мярекатдин эхирдай, сив хкудзавай чIавуз, вири мугьманар патал тIямлу лезги хуьрекар алай берекатлу суфраяр ахъайнавай.
Агьмед Магьмудов
