Руслан Гереев, журналист, ДГПУ-дин проректор:
“Дагъустандин Кьил Сергей Меликова Халкьдин Собранидиз ракъурнавай Чарче регион вилик финин асул рекьер тайинарнава. Зи фикирдалди, ада къейднавай кьилин терефар дагъустанвийрин уьмуьрдин, яшайишдин шартIар хъсанарунихъ галаз алакъалу я. Яшайишдин гьи хел вилик тухвайтIани, адан нетижайри чкадин агьалийрин агьваллувал артух хьуниз таъсир авун герек я.
Гьа са вахтунда Сергей Меликов вичин Чарче алай вахтунда республикадин гьукумдин вилик акъвазнавай, гьялна кIанзавай месэлайрикайни рахана. Бязибур гьялунин жигьетдай ада, мярекат кьиле физвай залда амаз, республикадин Гьукуматдиз, Халкьдин Собранидиз тапшуругъарни гана. И делилди региондин Кьил хъсандиз абурун гъавурда авайди къалурзава.
Украинада кьиле физвай махсус серенжемда иштиракзавай дагъустанвийриз, абурун хизанриз яшайишдин рекьяй куьмекар гунин месэлани кар алайбурукай сад я. И кар Сергей Меликовани тестикьарна. Ада, и жигьетдай икьван чIавалди кьиле тухванвай кIвалах къейд авуналди, идалай кьулухъни серенжемдин иштиракчийрин хизанриз куьмекар гун давам жедайдакай лагьана”.
«Лезги газет»
