Дагъустандин Пенсийрин ва яшайишдин страхованидин фондар сад авуналди, Яшайишдин фонд арадал атуникди, виликдай кьве фондуни кьиле тухузвай кIвалахни тамамдаказ давамар хъийида. Идакай мукьвара Дагъустандин Яшайишдин фондунин управляющийдин заместитель Шарабудин Даришмегьамедова меркездин страхователрихъ галаз кьиле тухвай гуьруьшдал лагьана. Тайинарнавай пулар (выплаты) гьа виликдай хьиз гуда, бязибур туькIуьрун патал гьатта кIваляй къецел экъечIунни герек къвезвач.
— Больничный чарар электронный къайдада тайинарзава. Яни духтурди азарлу хьанвай касдиз выписка гудай чIавуз зегьмет чIугвадай такьат авачирвиляй больничный чарни гузва, адан делилар гьасятда Россиядин Яшайишдин фондунин къурулушдиз къвезва ва кIвалах гузвайдал агакьарзава. Им гзаф регьят къайда я. Электронный къайдадин жуван больничныйрикай малуматар Яшайишдин фондунин хсуси кабинетдай жагъуриз жеда. КIвачел залан хьунихъ ва аял хунихъ галаз алакъалу яз гузвай, гьакIни аял хайила, са сеферда гузвай пулни (пособие) гила арза галачиз тайинариз жезва, Яшайишдин фондуниз финин ва арза гунин лазимвал авач. ИкI, работодателди мажибдин кьадардиз, кIвачел залан хьунихъни аял хунихъ галаз алакъалу тир отпускдиз ва ЗАГС-дайни аял хуниз талукь делилар СФР-диз агакьайла, гьукуматди гана кIанзавай пулар, лугьурвал, автоматически тайинарзава. Гьа и жуьреда работодателди кIвалахзавай дидейриз аялдин йисни зур жедалди гузвай пособини тайинарун лазим я. Эгер диде бейкар, жува-жув кIвалахдалди таъминарнавай кас (самозанятый) ва ИП-дин (индивидуальный предприниматель) дережа аватIа, пособие тайинарун патал, “Госкъуллугъар” порталдин куьмекдалди ва я Дагъустандин Яшайишдин фондунин муьштерийрихъ галаз кIвалахдай къуллугъдиз атана арза кхьин лазим я, — гъавурдик кутуна Шарабудин Даришмегьамедова.
Гуьруьшдал веревирд авур важиблу месэлайрикай мадни сад СФР-дин взносриз талукьди тир. Докладчикри къейд авурвал, икьван чIавалди компанийри страхованидин гьар са жуьре — пенсийрин, яшайишдин, медицинадин — патал кьилди взносар гузвай. Гила сад тир взнос гузва, амма ам, масадалай аслу тушиз, виликдай авай пуд жуьредизни пайзава. И серенжемдал страхователри вахтуналди зегьмет чIугвадай такьат авачирвилихъ ва дидевилихъ галаз алакъалу яз мажбуридаказ яшайишдин страхованидиз талукь гьахъ-гьисабрин месэлани веревирдна.
Къейд авун лазим я хьи, Дагъустандин Яшайишдин фондуни агьалияр гъавурдик кутунин серенжемар, республикадин шегьерра хьиз, вири районрани кьиле тухудайвал я.
«Лезги газет»
