И йикъара “Дагъустан” РИА-да республикадин военком, полковник Д. Мустафаева РД-дин газетрин ва телевиденидин журналистрихъ галаз 2023-йисан гатфарин призывдиз талукь пресс-конференция кьиле тухвана.
Военкомди вичин рахунар алатай йисан зулун призывдин нетижайрилай башламишна. Ада къейд авурвал, Дагъустандай Россиядин Яракьлу Къуватрин частариз 3,5 агъзур жегьил рекье туна. Абурукай 30 процент военный рекьяй пешекарвал къачунвайбур, 20 процент кьилин ва 17 процентни юкьван ва махсус пешекарвилин образование авайбур тир.
Гатфарин призывдив 1-апрелдилай гатIунна. Ам 15-июлдиз акьалтIда. Чи республикадай 4000 жегьилдиз армиядин жергейриз эвер гуда. Аквазвайвал, кьушунриз желбзавайбурун кьадар къвердавай артух жезва. Военкомди лагьайвал, уьлкведин президентди кьушунра къуллугъзавайбурун кьадар 1,5 миллиондив агакьарунин тапшуругъ ганва. И кар дуьньяда ва Россиядин сергьятрив кьиле физвай гьаларихъ галаз алакъалу я. Диде-бубайрин рикIерик квай къалабулух хкудун патал лугьун: армиядиз физвай жегьилри ДНР-да, ЛНР-да, Запорожьедин ва Херсондин областра къуллугъдач. Я абур военный серенжемризни желбдач. Къуллугъ куьтягьнамазди, абур кIвалериз ахъай хъийида.
Армиядин жергейриз жегьилриз эвер гунин кIвалах РФ-дин законодательстводин бинейраллаз ва къалурнавай вахтара кьиле тухуда. Армиядиз эвер гузвай чIехи пай жегьилар военный рекьяй чирвилер гузвай частариз, соединенийриз ракъурда ва абуру вад вацра алай аямдин военный техникадин рекьяй вердишвилер къачуда. Лугьун лазим я хьи, кьушунра илимдин 17 ва спортдин 5 рота ава. Анра гьа и жигьетдай чпихъ алакьунар, вердишвилер авай жегьилри къуллугъда.
Армиядин жергейриз эвер ганвай муькуь паюни, чпин образованидиз, пешекарвилин рекьяй алакьунриз ва сагъламвилиз килигна, талукь частара къуллугъда.
Д. Мустафаева малумарайвал, республикадин вири шегьеррин ва районрин призывдин комиссийра кIвалах тухун патал герек шартIар тешкилнава. Военный комиссариатрив герек парталар, суьрсет ва маса шейэр вахтунда агакьарнава. Шегьеррин ва районрин муниципалитетрин кьилери и кардал гуьзчивалзава.
Пресс-конференциядал контрактникрин къуллугъдиз талукь суаларни гана. Военкомди лагьайвал, Россиядин армияда къуллугъ ийиз иштагь авайбурун кьадар тIимил жезвач. Абур исятдани бес кьадарда ава. Контракт 1 йисан, 2, 3, 5 йисан муьгьлетдани кутIуниз жеда. Контракт кутIунайбуруз сифтедай са сефердин 195 агъзур манат гузва. Къуллугъдай вахтундани абурув вижевай мажибар ва алава пулар агакьзава.
Икьван гагьда контракт кутIунна, армияда къуллугъиз кIанзавайбурун алакьунар, сагъламвал, вердишвал Астрахандин пунктуна ахтармишзавайди тир. Гила Махачкъалада гьахьтин пункт кардик кутазва ва гадайризни рушариз Астрахандиз финин гереквал амукьдач.
Апрелдин сифте йикъара сифтебурук кваз армиядин жергейриз 200 кас рекье туна. Абур герек вири шейэралди таъминарна. Къуй дуьньяда ислягьвал хьурай!
Хийир Эмиров
