Алатай хемис юкъуз Махачкъалада суддин приставрин Федеральный къуллугъдин Дагъустан Республикада авай Управленидин залда и Управленидив ведомстводин пайдах вугуниз талукь шад мярекат хьана. Ана Россиядин Федерациядин ФССП-дин (Федеральная служба судебных приставов) Кьилин судебный пристав Дмитрий Аристова, СКФО-да РФ-дин Президентдин тамам ихтиярар авай векилдин аппаратдин федеральный кьилин инспектор Василий Колесникова, Дагъустан Республикадин Гьукуматдин Председатель Абдусамад Гьамидова, адан заместитель Рамазан Жафарова, Россиядин Федерациядин ФССП-дин Дагъустанда авай Управленидин регьбер Низами Гьалимова, къуватдин ведомствойрин векилри, ветеранри ва теклифнавай маса ксари иштиракна.
КIватI хьанвайбуру абур Россиядин Гимн ва гурлу капар ягъуналди къаршиламишна. Залдиз гъайи пайдах ведомстводин регьбердив шад гьалара вугана.
“Пайдах гзаф йисарин вахтунда михьивилин, лайихлувилин ва садвилин лишан хьана, — башламишна вичин рахунар мярекат тухузвай Дмитрий Аристова. — Гьуьрметдин и лишан вугун ведомстводин адетар мягькемарунин рекье важиблу кам къачун жеда. Пайдахди гьар са къуллугъчидин рикIел законлувал ва къайдаяр хуьнин карда буржи рикIел хкида. Умудлу я, ихтибарна вуганвай ядигар куьне пакдиз хуьда”, — лагьана Дмитрий Аристова.
Вичин нубатдай яз, Абдусамад Гьамидова къейдна: “…Къе суддин приставрин къуллугъ Россиядин государстводин органра лап важиблуди я. Куьне суддин къурулушда кьетIен роль къугъвазва, властдин органрин къарарар кьилиз акъудунин карда куьмек гузва. Умудлу я, куьн гележегдин агьалийрин итижар хуьнин къаравулда акъвазда. Квехъ регьят тушир кIвалахда агалкьунар, мягькем сагъламвал хьурай!”
Россиядин ФССП-дин Дагъустанда авай Управленидин регьбер Низами Гьалимова и лишанлу вакъиади ведомстводин авторитет хкаждайди, къуллугъчийрик жавабдар кIвалахда руьгь кутадайди къейдна.
В.Колесникова Дагъустандин приставриз и шад вакъиа тебрикна ва пайдахди РД-дин УФССП женгинин подразделение жедайди лагьана.
Эхирдай Управленидин тафаватлу жезвай къуллугъчийриз ведомстводин медалар, гьуьрметдин грамотаяр, чухсагъулдин чарар ва маса пишкешар гана.
Алаудин Гьамидов
