Мукьвара (17-23-апрелдиз) Хорватиядин Загреб шегьерда кьуршахар кьунин пуд жуьредай (азаддаказ, грекринни римлуйрин жуьреда ва дишегьлийри) кьиле фидай Европадин чемпионатда чи кьве ва­танэгьлиди — Азербайжандин патай экъечI­завай Жабраил Гьажиева ва Румыниядин патай — Якьуб Шихжамалова иштиракда. Абу­ру кьведани 74 кг-дал къведалди заланвал авайбурун арада чпин къуватар ахтармишда. Азаддаказ кьуршахар кьунин жуьредай 163 спортсменди гьасиррал чпин устадвал къалурда.

Къейд авун лазим я хьи, чи кьве ватан­эгьлиди йисан эвел кьилелай инихъ тухванвай 9 акъажунра чпин гьунарар виниз тир ус­тадвилелди къалурнава. Абурун арада­ Иван Ярыгинан Кубок патал, гьакIни Хорватияда ва Египетда кьиле фейи турнирар ава.

РикIел хкин: 2022-йисуз Ж.Гьажиева 21 йисал къведалди яшара авайбурун арада дуьньядин, гьакIни Европадин кIвенкIвечи­вал патал акъажунра гъалибвилер къазанмишна. 2019-йисуз ам Европадин кIвенкIве­чивал патал акъажунра — 2, Европадин жаванрин арада гатун Олимпиададин фестивалда, жаванрин арада дуьньядин кIвен­кIве­чивал патал акъажунра 1-чкайриз ла­йихлу хьана.

Якьуб Шихжамалова вичикай 2008-йисуз хабар гана. Калининградда азаддаказ кьуршахар кьунай Россиядин кIвенкIвечи­вал патал кьиле фейи акъажунра ада буьруьнждин медаль къазанмишна. Гьа и йисуз­ ам тренер Анвар Мегьамедгьажиева жаванрин арада Краснодарда кьиле фейи акъажунризни рекье твазва, инани ада 3-чка кьазва. Гуьгъуьнлай чи ватанэгьлиди международный хейлин турниррани вичин устадвал къалурна, жуьреба-жуьре медалар къазанмишна. Абурун жергедай яз, мукьвара Египетда кьиле фейи международный “Ибрагьим Мустафа” турнирда Я.Шихжамалова къизилдин медаль къазанмишна. Ам 4 сеферда гьасиррал экъечI­на. Адаз Къазахстандай (7:2), Бахрейндай (4:0), Египетдай (10:0) ва Туьркиядай (4:3 гьисабралди) тир спортсменар, финалда лагьайтIа, Олимпиададин къу­гъун­рин призер Сонер Демирташ кумукьна.

Рагнеда Рамалданова