Дагъустандин Кьил Сергей Меликован 2023-йисан 4-апрелдиз акъуднавай 80-нумрадин Указдалди, кIвалахда агалкьунрай ва журналистикадин хиле гьакъисагъвилелди зегьмет чIугунай “Лезги газетдин” кьилин редактор Мегьамед Ибрагьимович Ибрагьимоваз “Дагъустан Республикадин лайихлу журналист” лагьай гьуьрметдин тIвар ганва.
М.И.Ибрагьимова “Лезги газетдиз” 2017-йисан январдин вацралай регьбервал гузва. И йисара газетдин редакцияда хъсан патахъ хейлин дегишвилер кьиле фенва. Спонсорар желб авуналди, республикадин газетринни журналрин дараматдин “Лезги газетдин” редакция авай мертебадин дегьлизда ремонтдин кIвалахар кьиле тухванва, газетдин тарихдиз талукь музей, редакцияда лезги эдебиятдин махсус ктабхана арадал гъанва, “Халкьдин кимел”, “Лезги чIалан ктабар”, “Лезги чIалай онлайн-курсар” проектар кьилиз акъуднава ва и кар давам жезва. “Лезги газетдин” редакцияди гьар йисуз Махачкъаладинни Каспийскдин ва “Леки” фондунихъ галаз санал Кьиблепатан Дагъустандин шегьерринни районрин мектебра кIелзавай аялрин арада лезги чIалай олимпиадаяр, “Лезги газет” кIелзавайбурун арада диндин конкурс тешкилзава, хейлин маса мярекатар кьиле тухузва. Вири и крарик М.Ибрагьимован лайихлу пай ква.
Къенин юкъуз “Лезги газет”, тираждал ва газетдин сайтдиз йикъан къене гьахьзавай инсанрин кьадардал гьалтайла, Дагъустандин милли чIаларал акъатзавай изданийрин арада 1-чкадал ала.
КIвалахда агалкьунрай М.И.Ибрагьимов виликдай РД-дин Кьилин, РД-дин Гьукуматдин Разивилин чарариз лайихлу хьана. Ам гьакIни Дагъустандин халкьдин шаир Юсуп Хаппалаеван ва лезги публицистикадин хиле арадал гъанвай, Рамил Микаилован тIварунихъ галай премийрин лауреат я.
Къейд ийин хьи, “Дагъустан Республикадин лайихлу журналист” тIвар цIийиз арадал гъанвайди ва М.Ибрагьимов лезгийрикай и тIварцIиз лайихлу хьанвай сад лагьайди я.
“Лезги газетдин” редакциядин коллективди Мегьамед Ибрагьимоваз гьуьрметдин чIехи тIвар рикIин сидкьидай мубаракзава ва адахъ чандин сагъвал ва мадни еке агалкьунар хьун алхишзава.
«Лезги газет»
