Мегьарамдхуьруьн райондин администрациядин информациядин къуллугъди хабар гузвайвал, къушчивилин “Гуьней” фабрикада рабочийрин игьтияж арадал атанва.
Малум хьайивал, муниципалитетдин кьил Фарид Агьмедован тIварцIел “Гуьней” ООО-дин гендиректор С.Виноградова къушчивилин фабрикада рабочий къуват бес тежезвайди къейдзавай ва Мегьарамдхуьруьн райондин агьалияр карханада кIвалахунал желб авунин карда куьмек тIалабзавай чар агакьнава.
Къейдзавайвал, фабрикадиз къушар гьасилунин чкадин операторар ва верчер кьадай рабочияр лазим я. КIвалахал кьабулун патал ийизвай истемишунрикай (коллективдихъ галаз санал кIвалахун, къайда-низам хуьн, гьакIни хатасузвилин техникадал амал авун ва хсуси майишатда кIвалин къушар тахьун) райондин сайтда тамамдаказ кхьенва. Къейд ийин, ина кIвалахун патал кьетIен чирвилер герек туш — кIвалахиз башламишайла, вири чирвилер гуда.
Операторрин хиве гьатдай везифаяр: биологиядин жигьетдай хуьнин къайдайрал амал авун; гьар юкъуз къушар ахтармишун, абур авай гьал чирун; зайиф ва азарлу верчер амайбурукай хкудун; къушариз датIана тIуьн ва яд гунал гуьзчивал авун, корпусда авай гьавадин михьивал, чимивал ва ламувал хуьн; къушарин заланвал алцумун ва гьисабдиз къачун.
ШартIар: 21 агъзур манатдилай виниз кьадарда аваз мажиб ва премияр; яшайишдин рекьяй кьезилвилер ва заминвилер.
Верчер кьадай касдин хиве авай везифа сад я: абур кьун ва тукIвадай чкадиз ракъурун патал клеткайра тун. “Гуьней” фабрика (кIвалахдай чка) Мегьарамдхуьруьн райондин Уружба хуьруьн мулкунал ала.
Фабрикада кIвалахал кьабулун патал агъадихъ галай нумрайрай кIвалахдин йикъара пакаман сятдин 9-далай нянин сятдин 5-далди кьван зенг ийиз жеда: 8-8722-98-92-77; 8-928-680-41-61.
Гьазурайди — Жасмина Саидова
