Махачкъаладин аэропортуна самолетри лув гудай цIийи полоса (взлетная полоса) туькIуьрда. И кIвалах 2023-йисуз башламишун ва 2025-йисуз акьалтIарун пландик кутунва. И кар кьилиз акъудун патал республикадиз федеральный бюджетдай чара ийидай пулдин такьатар тайинарнава.
Виликдай, 2021-йисан къиметар фикирда кьуна, и проектдиз 10,5 млрд манат ахъайдайди раижнавай, амма гуьгъуьнлай адан кьадар 13,5 млрд манатдал кьван хкаж хъувуна.
Санлай къачурла, проектдин сергьятра аваз, бетондикай тIебии тушир (искусственный) цIийи полоса туькIуьрда, перрон 20-дав агакьна самолетар акъвазариз жедайвал гегьеншарда ва са жерге маса кIвалахар ийида.
Гележегда самолетри лув гудай цIийи полосадин технический майдандин яргъивал 3,2 километрдив, гьяркьуьвал 45 метрдив агакьда. Ихьтин полосадивай вири жуьрейрин самолетар кьабулиз жеда.
«Лезги газет»
