Пул ва улакь чуьнуьхунай
Казбек райондин полициядин отделдив Дылым хуьруьн мискIиндай садакьаяр патал кIватIнавай пул авай ящик малум тушир касди чуьнуьхнава лагьай малумат агакьна. Идакай РД-дин МВД-дин пресс-къуллугъди хабар гузва.
Полициядин оперуполномоченный къуллугъчийри шак физвай кас тайинарна — ам Бабаюрт райондин 17 йисан яшда авай жегьил я. Ада вичи авур кар хиве кьунва.
Малум хьайивал компьютердин къугъунрал жегьилдин гзаф рикI алайвиляй, и кардал кIевиз вердиш хьанвайвиляй бубадинни адан арада векъи рахунар хьана. Гуьгъуьнлай гада рекьел гьалтай улакьда акьахна, хуьруьз фена ва анин мискIиндай садакьаяр патал кIватIнавай пул авай ящик чуьнуьхна. Идалай кьулухъ ада куьчедал алай “ВАЗ-21099” машинни чуьнуьхна. Физвай рекье улакьдин бензин куьтягь хьана. И чIавуз ада машин гьа алай чкадал туна, пул авай ящик къванералди кукIварна, ана авай 9250 манат акъудна, кIвачи-кIвачи Хасавюрт галай патахъ рехъ давамарна. И рекье ам полициядин къуллугъчийри кьуна.
Абуру пул вахчуна ва мискIиндив ахгакьарна. И делилдай суд-силис авун патал материал кIватIнава.
«Лезги газет»
