И мукьвара Махачкъалада, Ши­иратдин театрда, “Дагъустандин композиторрин музыкадин панорама” тIвар алаз Дагъустандин культурадин министерстводи, Дагъустандин операдинни балетдин гостеатрди, Россиядин композиторрин Союздин Дагъустандин отделениди тешкилнавай республикадин музыкадин IV фестивалдин сергьятра аваз чи ватанэгьли, музыкадин алемда агалкьунар къазанмишиз алакьнавай международный ва Вирироссиядин кон­курс­рин лауреат Мадина Шагьмурадовадин кьилдин концерт кьиле фена. Ана гьакIни Дагъустандин халкьдин алатрин госоркестрди, Дербентдин музыкадин училищедин “Элегия” ансамблди, РД-дин халкьдин артист Абдула Мегьамедмирзаева, РД-дин лайихлу артист Арслан Шагьмарданова, Да­гъустандин операдинни балетдин театрдин солистрин дестеди — Арсен Велибегова, Салман Абасова, Белек Абасова, концертмейстер Залике Шагьмурадовади ва масабуру иштиракна…

Гуьрчег, михьи, гужлу сес авай, гьа са вахтунда рикIи чIугвадай, акахьдай къилихрин инсан, лезги чилин тават… — гьа ихьтинди яз акуна заз Мадина Шагьмурадова. Мукьувай таниш хьайила, заз адахъ, музыкадин рекьяй бажарагълувал, устадвал хьиз, уьмуьрдин амай хилерайни агалкьунар авайди тестикь хьана.

РД-дин халкьдин артист Новруз Шагьбазова регьбервал гузвай Да­гъустандин халкьдин алатрин гос­оркестрдихъ галаз ада тамамарай “Магьи дилбер” манидалди ачухай концерт, дугъриданни, рикIи кужумдай манийралди девлетлуди тир. Чи халкьдин манийрихъ галаз сад хьиз, Дагъустандин маса халкьарин (абурун векиларни залда ацукьнавай) ва урус чIаларалди  Мадинади кьилди ва вах Наилядихъ галаз устадвилелди тамамарай манийри залда авайбурун гуьгьуьлар хкажна. Язавай гурлу капарини багъишзавай цуькверин кIунчIари и кар мадни тестикьарзавай. Мадинади, халкьдинбур хьиз, Дильмира Ашурбеговадин, Расул Гьамзатован, Фазу Алиевадин (ва масабурун) чIалариз Маина Абдулмуталибовади, Насир Шагьмурадова ва маса композиторри музыка туькIуьрнавай манияр тамамарна. Адахъ яб акализ атанвайбурун арада Дагъустандин операдин ва балетдин гостеатрдин регьбер Мегьа­мед Абасов, Дербентдин музучилищедин директор, РД-дин культурадин лайихлу работник Камила Магьмудова, музыкадал рикI алай ксар, мугьманар авай.

Инсанрин къилихарни хесетар хьиз, абуру хкязавай пешеярни жуьреба-жуьре я. Уьмуьрда виридалайни кьилинди, инсанар, об­щес­т­во патал гзаф герекди, важиблуди гьи пеше я? И суалдиз за икI жаваб гуда: жуван рикIиз кIаниди! Ри­кIиз хуш, жув бахтлу ийидай пешедин иеси хьунихъ уьмуьрда тIимил важиблувал авач. Ашкъи аваз кьилиз акъудзавай гьар гьи кIвалахдихъ хьайи­тIа­ни, хъсан нетижани, агалкьунарни жеда… Мадни ич тарцивай яргъаз аватдач лугьузва бубайрин мисалда. ИкI тирди М.Шагьмурадовадин дуь­шуьш­ди мад сеферда субутарзава. Ада вичин бубадин рехъ уьзягъ­вилелди давамарзава.

Мадина РД-дин искусствойрин лайихлу деятель, композитор, Дербентдин музучилищеда тамам 45 йисуз зегьмет чIугвазвай, халкьдин музалатрин оркестрдиз регьбервал гузвай Насир Бубаевичан хизанда 1988-йисан 21-мартдиз дидедиз хьана. Мадинадин диде, РФ-дин ла­йихлу муаллим Инжи Мегьтихановна художественный гимнастикадай Азербайжан республикадин чемпионка я. Мадинади Дербентдин музучилище, Астрахандин госконсерватория акьалтIарна, вокалдин искусстводай пешекарвал къачуна. Алай вахтунда  ам анин магистратурадин (отделение академического пения) 1-курсунин студентка я. Адан чIехи вах Наиля Шагь­мурадовади Дербентдин музыкадин училищедин «Элегия» ансамблдиз регьбервал гузва. Наилядин руш Заликени (концертмейстер яз, адани и  концертда  иштиракна) музыкадал машгъул я.

Зегьметдин рехъ М.Шагьмурадовади 2008-йисуз хайи шегьерда искусствойрин 3-нумрадин школада фортепианодай муаллим яз кIва­лахунилай башламишна. Гуьгъуьн­лай Дербентдин педколледжда, шегьердин 9-нумрадин СОШ-да кIвалахна. 2013-йисалай инихъ ам манийрин ва кьуьлерин “Дагъустан” госансамблдин, гьакI Дагъустандин операдинни балетдин гостеатрдин хордин солистка я. Мадина Махачкъаладин жегьилрин парламентдин, “Сад тир Россия” партиядин член, “Каспий”, “СелиАС”, “Машук” форумрин иштиракчи я. Адаз, урус ва лезги чIаларилай гъейри, ингилис ва итальян чIаларни чида.

Чна винидихъ къейднавайвал, Мадина Насировнади хейлин конкурсра гъалибвилер къазанмишна. Кьилди къачуртIа, ам “Свободное Отчество” международный кон­курс­дин, “Лезги сес” манидин конкурс-фестивалдин 1-дережадин лауреатвилин тIварариз лайихлу хьана. Ам Сочида музыкадин искусстводай кьиле фейи Вирирос­сиядин ачух конкурсдин, Париж, Волгоград, Находка шегьерра — международный конкурс-фестивалрин 2 ва 3-дережайрин лауреат, хейлин дипломрин ва гьуьрметдин грамотайрин сагьиб я. Кьилди къачуртIа, яргъал йисара гьакъисагъвилелди зегьмет чIугунай ам Дагъустандин культурадин министр Зарема Бутаевадин къул алай Гьуьрметдин грамотадиз лайихлу хьана. Ихьтин шабагьриз Мадина Шагьмурадова Дагъустан Республикада дуствал мягькемаруник, миллетрин ва конфессийрин арада меслятвал хуьнай, Дагъларин уьлкведин этнокультурадин жуьреба-жуьревал хуьник пай кутунай ва яргъал йисара санал кIва­ла­хунай РД-дин милли политикадин ва диндин крарин рекьяй министр Энрик Мус­­лимован,  гьа­къи­сагъ зегьметдай, ви­низ тир пеше­кар­виляй ва учи­лище­дин уьмуьр­да активнидаказ иштиракунай Дербентдин музучилищедин ­директор Камила Магь­мудовадин патайни лайихлу хьана. Ам Калмыкиядин культурадин ва туризмдин министерстводин, Волгоград шегьердин администрациядин культурадин крарин рекьяй комитетдин (ва икI мад) чухса­гъулдин чарарин сагьибни я.

Къуй чи бажарагълу таватдихъ гьам музыкадин рекье, гьам уьмуьр­да мадни еке агалкьунар хьурай!

Рагнеда Рамалданова