Гьа ихьтин лишандик кваз 18-мартдиз Махачкъалада, Къумукьрин А.П.Салаватован тIварунихъ галай театрда, РД-дин халкьдин артистка, Ингушетиядин лайихлу артистка Зульфия Ильясовадин мергьяматлувилин концерт кьиле фена. Билетрихъ хьайи пулдин такьатар Россиядин армиядин аскерриз ва военный махсус серенжемда телеф хьайи иштиракчийринни ветеранрин хизанриз куьмекар гудай фондуниз рекье твадайвал я.
Крым Россиядик акат хъувуна 9 йис тамам хьуниз талукьарнавай мярекат Дагъустандин милли политикадин ва динрин крарин рекьяй министерстводин управленидин начальник М.Даитбегова министр Э.Муслимован тIварунихъай Зульфия Ильясова тебрикна. Адан яратмишунриз виниз тир къимет гун яз, жегьилар ватанпересвилин руьгьдаллаз тербияламишуник лайихлу пай кутунай, “миллетрин арада ислягьвал ва разивал мягькемарунай” адав министерстводин гьуьрметдин лишан вахкана.
— Куьне алай вахтунда женгинин майданра женг чIугвазвай ксариз, гьар юкъуз чпин чанарилайни гъил къачуналди, уьлкведин бахтлу гележег патал къалурзавай кьегьалвилериз, игитвилериз талукь манияр лугьунал чун гзаф шад я. Им Ватандихъ, хизандихъ, дидедихъ авай кIанивал къалурун я, — алава хъувуна ада.
«Лезги газет»
