И йикъара Кабардино-Балкариядин меркез Нальчик шегьерда 15 йисал къведалди яшда авай гадайрин, гьакIни рушарин арада дзюдодай СКФО-дин кIвенкIвечивал патал кьиле фейи акъажунра Дагъустандин хкянавай команда (вири санлай 18 медаль къазанмишуналди, абурукай къизилдинбур — 7) 1-чкадиз лайихлу хьана.
Шадвилелди мадни а кардикай хабар гуз кIанзава хьи, республикадин хкянавай командадик кваз вичин алакьунар къалурай жаванрин арада ери-бине Докъузпара райондин Усугъчайдилай тир Рамазан Къарибовни ава. ИкI, 66 кг-дал къведалди заланвал авайбурун арада ам къизилдин медалдиз лайихлу хьана. Махачкъалада яшамиш жезвай ва ина спортдин рекьяй устадвал хкажзавай жегьилди гила 1 ва 2-апрелдиз Мурманскдин областдин Полярные Зори шегьерда кьиле фидай Россиядин кIвенкIвечивал патал акъажунриз гьазурвал аквада.
Рагнеда Рамалданова
