Алатай гьафтедин ял ядай йикъара Кьурагь райондин КIирийрин хуьруьн школа-интернатдин спортзалда, Советрин Союздин Игит Эсед Бабастанович Салигьован экуь къаматдиз бахшна, итимрин командайрин арада волейболдай республикадин дережадин 51-турнир кьиле тухвана. Идакай чаз райадминистрациядин пресс-къуллугъди хабар гана.
Турнирда Хив, СтIал Сулейманан, Мегьарамдхуьруьн, Ахцегь, Кьурагь районрай ва Дербент шегьердай тир командайри иштиракна. Гьам иштиракчийри, гьамни мугьманри къейд авурвал, ам хъсан тешкиллувал аваз кьиле фена. Спортдин майдандал, кьве дестедиз пайна, тешкилнавай къугъунриз тамашиз, гьатта республикадин жуьреба-жуьре районрай атанвайбурун кьадарни тIимил тушир,
ИкI, къизгъиндаказ кьиле фейи къугъунрин нетижада Кьурагь райондин команда 1-чкадиз лайихлу хьана. СтIал Сулейманан райондин командади — 2, Дербент шегьердин — 3, Хив райондин — 4-чкаяр кьуна. Гъалиб хьайи вири командаяр медалриз, грамотайриз, пулдин ва спортдиз талукь пишкешриз лайихлу хьана.
Турнирда виридалайни хъсандиз къугъвайбур яз гьисабай Кисмир Ягъибеговаз (Хив), Радик Къазихановаз (Ахцегь), Максим Гьасановаз (Мегьарамдхуьр), Арсен Гуьлмегьамедоваз (Дербент), Тимур Небиюллаеваз (Кьасумхуьр), Гьамидуллагь Мамедоваз (Кьурагь) кьилдин пишкешар гана. Судьяйрин кIвалахни къейд тавуна тунач. Къугъунриз тамашиз атанвай бязи ксаривни пишкешар агакьна.
Чи мухбир
