Россиядин Яракьлу Къуватри Украинада женгинин махсус серенжем кьиле тухуз са йисалай виниз вахт хьанва. Ана, Россиядин вири субъектрай хьиз, Дагъустан Республикадай, гьа гьисабдай яз СтIал Сулейманан райондайни цIудралди офицерри, контрактникри, тамам тушир мобилизациядик акатна фейибуру иштиракзава, чпин хиве авай ватанпересвилин буржи намуслудаказ кьилиз акъудзава. Абурукай садахъ — Кьасумхуьрелай тир старший лейтенант Расим Гьаруновахъ — галаз чун и йикъара таниш хьана. Украинада кьиле физвай махсус серенжемда хер хьана, Москвада госпиталда сагъар хъувурдалай гуьгъуьниз ам кIвализ отпускдиз хтанвай.
Расим Гьаруновахъ галаз ихтилатар ийиз фейила, адан баде ФатIимат Тагьировнади, хур медалри, женгинин знакри кьунвай хтулдин гардандихъ гъил вегьена, сивел хъвер алаз, лагьана: “За зи хтулдал, хайи Ватан хуьзвай кьегьал хцел дамахзава!” (шикилда).
Расим Гьарунов зегьметдин ветеран ФатIимат Тагьировнадин рушан гада я. Расиман дах Имамани, офицер яз, Украинада кьиле физвай махсус серенжемда иштиракзава. Расиман имиярни армиядин офицерар я.
Вичин дахдилай ва имийрилай чешне къачуна, Расим Гьаруновани гележегдин пеше яз Яракьлу Къуватрин офицервилин пеше хкяна.
1996-йисуз дидедиз хьайи Расима ЦIийи поселокдин ва Каспийск шегьердин школайра кIелна. Ам спортдални рикIивай машгъул хьана.
Школа, гуьгъуьнлай Санкт-Петербургда артиллериядин высший военный училище акьалтIарай Р. Гьарунова Санкт-Петербургда ва масанра взводдин, батареядин командир яз къуллугъна.
Махсус серенжемда сифте йикъарилай иштиракзавай старший лейтенантдиз Жукован, “Жуьрэтлувиляй”, “Женгера тафаватлувиляй”, “Дирибашвиляй” медалар ва женгинин знакар ганва.
— Расим Имамович, армиядин жергейра къуллугъ ийиз физвай жегьилрин диде-бубайриз вуна вуч лугьудай? — хабар кьуна за.
— РФ-дин армиядин жергейриз шаз эвер гайи ва цIи эвер гудай жегьилри уьлкведин мулкунал алай частара къуллугъзавайди я. Абуру Украинада кьиле физвай махсус серенжемда иштиракзавайди туш. Армиядин жергейра къуллугъна куьтягьайбурувай, контракт кутIунна, къуллугъ давамариз жеда. Им гьар са жегьилдин хушунин кар я.
— Зи хтул Расиман мехъерик за квез мадни бул ва девлетлу суфраяр къурмишда, — лагьана ФатIимат Тагьировнади. — Зи хтул ва махсус серенжемда иштиракзавай вири кьегьалар, гъалибвал къачуна, сагъ-саламатдиз диде-бубайрин хизанрин патав хтурай!
— Амин! — лугьузва чнани.
Хазран Кьасумов
