13-мартдиз Избербаш шегьердин 10-нумрадин юкьван школада, Украинада кьиле физвай махсус серенжемда телеф хьайи Азим Эрзиманович Муслимоваз мемориалдин кьул ачухуниз талукьарна, ясдин митинг кьиле фена.
Митингда РД-дин Кьилин советник Шамил Алиева, Избербаш шегьердин администрациядин кьил Мегьамед Исакьова, шегьердин депутатрин собранидин прдседатель Расул Бакаева, Азиман дах подполковник Эрзиман Муслимова, жемиятдин “Дидейрин къуват” тешкилатдин регьбер Сефижат Мегьамедрасуловади ва и тешкилитдин са жерге векилри, Россиядин Игит Нурмегьамед Гьажимегьамедован диде Сапижат Мазаевади, Избербаш шегьердин, Къаякент ва Къарабудахкент районрин военный комиссар Даидбег Шагьбанова, телеф хьайи офицердин уьмуьрдин юлдаш Алинади, мукьва-кьилийри, ветеранрин ва жегьилрин жемиятрин тешкилатрин векилри, и цIарарин авторди, муаллимри, аялри ва масабуру иштиракна.
Муслимов Азим Эрзиманович 1995-йисуз Избербаш шегьерда Россиядин Армиядин жергейра къуллугъзавай офицер Эрзиман Азимовичан (ери-бине СтIал Сулейманан райондай я) ва прапорщик Мегьрибан Амрулаевнадин хизанда дидедиз хьана.
2009-йисуз Буйнакск шегьердин 9-нумрадин юкьван школада 9-класс чешнелудаказ акьалтIарна, ам Владикавказ шегьерда авай Суворован училищедиз гьахьна. Анаг куьтягьайла, Чечен Республикадин Борзое поселокда авай 42-лагьай мотострелковый дивизиядин 291-мотострелковый полкунин зенитдинни ракетайрин взводдин командирвиле ракъурзава. 2019-йисуз Смоленскда ПВО-дин Академиядик экечIзава.
2020-йисуз Азим эвленмиш хьана. 2021-йисуз адан уьмуьрдин юлдаш Алинади адаз руш багъишна. Хтул гъилиз атай диде-бубадин шадвилерин а кьил авачир. 2022-йисуз, гьайиф хьи, чIулав хабар агакьна.
Угледар пата авай Николаевское хуьре женгинин везифаяр тамамардайла, вичин взвод ва женгинин улакьар ангардай ахкъудиз, къутармишзавай вахтунда душмандин мина аватна, жегьил офицер телеф хьана.
Украинада кьиле физвай махсус серенжемда къалурай дирибашвиляй, викIегьвиляй 2022-йисан 22-мартдиз Президентдин Указдалди ракетайринни зенитдин взводдин командир, Россиядин Яракьлу Къуватрин лейтенант Азим Муслимоваз (телеф хьайидалай кьулухъ) “Жуьрэтлувиляй” орден гана.
Адан дах Эрзиман Муслимов подполковник, РД-дин Кьилин ва Гьукуматдин Администрациядин 2-отделдин начальник я. Ада гуржийринни осетинрин арада акьунра, Чечен Республикада, Сирияда ва Украинада кьиле фейи женгерин гьерекатра иштиракна. Ам “Жуьрэтлувиляй” ордендин, “Дирибашвиляй”, Сириядин “За боевое содружество”ва РФ-дин МО-дин 12 медалдин сагьиб я.
Мегьрибан Муслимовади Чечен Республикада кьиле фейи женгерин гьерекатра ва гуржийринни осетинрин арада хьайи акьунра иштиракна. Ам РФ-дин оборонадин министерстводин ругуд медалдин сагьиб я. Алай вахтунда пенсияда ава.
Митинг Россиядин Гимн тамамарунилай гатIунна. Мярекатдал рахай Шамил Алиева, Мегьамед Исакьова, Даидбег Шагьбанова, Расул Бакаева, Сапижат Мазаевади ва масабуру Азим Муслимован мукьва-кьилийриз мад сеферда башсагълугъвал гана, аскеррин кьегьалвилерикай лагьана.
Гуьгъуьнлай Азиман вахан веледри, школада кIелзавай аялри ватанпересвилин шиирар кIелна. “Дербент” ансамблдин солист, машгьур манидар Ислам Велиханова шаир А.Исмаилован “Донбассдин Игитар” (музыка - Къ.Ибрагьимован) мани тамамарна. Азим Муслимован диде Мегьрибана хизандин патай шегьердин администрациядин руководстводиз, “Дидейрин къуват” тешкилатдиз сагърай лагьана.
— Чун, рухваяр телеф хьанвай дидеяр, гъавурда ава: чи игит рухвайривай масакIа жедач — Ватан хвена кIанда! “Чна хуьн тавуртIа, бес ам ни хуьда?” — лугьудай зи хци. Рухвайрал дамах авунин гьиссди чав къе яшамиш жез тазва. Анжах санал алаз, сад хьана, чун мягькем я ва ида чаз дерт кьезилардай мумкинвал гузва.
Мемориалдин кьул Мегьамед Исакьова ва офицердин буба, подполковник Эрзиман Муслимова ачухна. Избербашдин 10-нумрадин юкьван школа А.Муслимован тIварцIихъ язава.
Къагьриман Ибрагьимов
