Йисан сифте кьиляй Дагъустанда метягьрин къиметар 2,1 процентдин хкаж хьанва. Кьилди къачуртIа, 2023-йисан тек са февралдин вацра къиметар 1 процентдин виниз акъатна. Идакай “Дагъустандин экономика” телеграм-каналди хабар гузва.
“Дагестанстат”-дин делилралди, февралдин вацра недай ихьтин суьрсетрин къиметар хкаж хьана: емишринни салан майвайрин (6,8 процент) балугъдин ва гьуьлуьн маса продуктрин (4,9% процент), какайрин (6,8% процент).
Гьа са вахтунда гьайванрин ва къушарин якIун къимет (0,5 процент), ракъинин гъеридин (0,3 процент), пасукIдин (0,2 процент) ужуз хьанва.
Чешмеди мадни къейдзавайвал, недай суьрсетдик акат тийизвай са бязи метягьрин къиметарни агъуз аватнава. Кьилди къачуртIа, эцигунардай материалар, электрометягьар, машинра кудай затIар (топливо) авайдалай тIимил кьван ужуз хьанва.
Чи мухбир
