Украинада военный махсус серенжемда викIегьвилелди иштиракай ва телеф хьайи аскерар рикIел хуьнин мураддалди Мегьарамдхуьруьн районда мемориальный кьулар эцигунин мярекат кьиле фена. Ам райондин администрациядин кьил Фарид Агьмедова ва уьтквем вад аскердин багърийри ачухна.
Бут-Къазмайрин юкьван школадин гьаятдиз гьахьзавай пипIел ина кIелай Самур Шагьмарданован, Малик Мегьамедован, Мегьамед Жафарован ва Артур Ширинован шикилар алай мемориальный кьулар эцигна.
Райондин ЦIийихуьре (Новоаул) махсус серенжемда телеф хьайи аскер Жамирзе Сафаралиеван шикил алай кьул эцигна. Виликдай Школьная тIвар алай куьчени Ж.Сафаралиеван тIварунихъ янава.
“Ватандин вилик чпин буржи кьилиз акъудай игитрин къаматар гьамиша чи рикIера амукьда. Абуру чпин тIварар тарихда кхьена ва несилри сада-садал агакьарда. Ахьтин кьегьалар тербияламишай диде-бубайриз баркалла!” — лагьана Ф.Агьмедова.
***
Райондин администрациядин кьил Фарид Агьмедов 17-мартдиз Донбассдин шегьерар, хуьрер Украинадин миллетбазрикай азадзавай серенжемда иштиракзавай районэгьлияр тир аскеррихъ галаз гуьруьшмиш хьана.
“Лугьузвайвал, игитар яз хазвайди туш, игитар гьакъикъи крари майдандиз акъудзавайди я. Къе и кар мад сеферда субут жезва. Чи къагьриман рухвайри Ватандин ва гьар са агьалидин итижар уьтквемвилелди хуьзва”, — къейдна Фарид Агьмедова. Ада аскеррихъ галаз хушвилелди суьгьбетна, абурун крарикай, женгерикай, акьалтзавай четинвилерикай хабарар кьуна.
“Гьелбетда, Россиядин гьукуматди, халкьди гузвай куьмекди чи кьегьалар гьевесламишзава, абуруз гьахълу кар патал чIугвазвай женгера мадни къуватар гузва. Чунни гуьгъуьна акъвазнавач. Махсус серенжемда иштиракзавай саки вири аскеррихъ, офицеррихъ галаз алакъа хуьзва. Абурун хизанриз куьмекар гузва. Яшайишда арадал къвезвай абурун месэлаяр гьялзава. Чун патал им виридалайни важиблу кар я”, — лагьана Фарид Агьмедова.
Украинадин миллетбазрихъ, неонацистрихъ галаз тухузвай женгера къалурзавай викIегьвал, дирибашвал фикирда кьуна, 21 аскердиз райондин кьили гьуьрметдин грамотаяр гана.
Нариман Ибрагьимов
