Сбербанкдини Дагъустанди алакъалувилелди кIвалахун давам жезва. Санал ийизвай гьакъикъи кIвалахрикай 21-мартдиз РД-дин Кьил Сергей Меликованни Сбербанкдин кьиблединни рагъакIидай патан банкунин председатель Анатолий Песенникован арада кьиле фейи гуьруьшдал ихтилатна.

Гуьруьшдин вахтунда Сергей Меликова къейдна: “Милли проектрин ва государстводин маса программайрин сергьятра аваз, жуьреба-жуьре тапшуругъар гьялунани, инвестицийрин кIвалахрихъ, гъвечIи ва чIехи бизнес еримлу авунихъ галаз алакъалу месэлайрани чи арада хъсан алакъаяр арадал атанва.

Алатай йисуз чна Сбербанкдин кьиле авайбурухъ галаз Дагъустандин мулкара туриствилин кластерар вилик тухунин жуьреба-жуьре проектар веревирдна. Исятдани чна Къаякент ва Дербент районра курортдин еке зона арадал гъунин рекье Сбербанк чи кьилин амадаг яз гьисабзава. За умуд кутазва хьи, и жигьетдай кьве патазни хийир жедайвал кIвалахдай хъсан гележег ава”.

А. Песенникова малумарайвал, къенин юкъуз 1,3 миллион кура-кура муьштерийриз ва 24 агъзурдалай гзаф бизнесриз Сбербанкдин Дагъустандин отделениди къуллугъзава. 2023-йисан эвел кьиле кредитдин умуми кьадар 66 миллиард манатдиз мукьва хьана, пассиврин умуми кьадар лагьайтIа, 110 млрд манатдилай алатна, жавабдарвилин финансированидин кьадар 4,5 сеферда артух хьана — 41 миллион манатдилай 186 миллион манатдал кьван.

“Пулунин такьатрин куьмекдилай гъейри, чаз туризмда, алишверишда, АПК-да, здравоохраненида, образованида, юзан тийидай эменнида ва гзаф маса хилера Сбердин рекъемрин кIвалахриз муьштерияр акъатзавайди акваз са шумуд йис я”, — лагьана А.Песенникова.

Чи мухбир