3-мартдиз Дербент шегьердин кьил Рустамбег Пирмегьамедова 2-нумрадин школа-интернат цIийикIа туькIуьр хъийизвай гьал ахтармишна. РикIел хкин, Дагъустандин Кьил Сергей Меликов алатай йисан апрелдин вацра Дербентдиз атайла, 2-нумрадин школа-интернатдиз фенай.
Анаг авай гьал акурла, ада “Дербент шегьердин мулкар вири патарихъай виликди тухун” программадин сергьятра аваз цIийикIа туькIуьр хъувун патал дарамат шегьердин хсусиятдиз вахкудай документар куьруь вахтунда гьазурунин тапшуругъ ганай. Интернат эцигнавай 1969-йисалай и дараматдиз цIийикIа туькIуьр хъувун акунач. Къейд ийин, интернатдин мулкунал учебный корпус, яшамиш жедай кIвалер, актовый зал, тIуьн недай ва спортдин залар, медпункт ала.
Гила школа-интернатдин дараматдин вилик пад, куьгьне полар, кабинетрин цлар, къавар, дегьлизар вири цIийи хъийида. ЦIийи ракIарар, дакIарар кутада. КIвалах хъсандиз вилик тухун патал классар, кабинетар къулай мебелдалди, гьакIни алай аямда лазим къвезвай тадаракралди таъминарда. Школадин патав гвай чкадани къулайвилер твада.
Къагьриман Ибрагьимов
