“Ахцегь район” муниципальный тешкилатдин депутатрин собранидин председатель Абдул-Керим Палчаев и йикъара “ЭкоЭнерджи” компанийрин дестедин руководитель Артур Алибеговахъ ва РД-да энергиядин гуьнгуьна хутаз жедай чешмеяр (ВИЭ) виликди тухунин Проектдин офисдин координатор Идрисгьажи Мегьамедовахъ галаз гуьруьшмиш хьана. Терефри Фий ва Гутум вацIарал гъвечIи 2 гидроэлектростанция эцигунин, гьакIни Ахцегь районда ракъинин энергетикадин месэла виликди тухунин жигьетдай авай мумкинвилер веревирдна.
ГъвечIи гьар са гидростанциядихъ 1 МВт гужлувал ава. Им Ахцегь вацIун дереда авай хуьрер электроэнергиядалди таъминарун патал бес кьадар я.
“ЭкоГЭС” технологиядин гидростанцийрин гъвечIивилин бинеда яд деривациядин жуьреда акъудун, яни асул вацIал банд эцигна ваъ, тIебии тушир кьилдин къаналриз паюнин къайда ава. Адетдин кIвалин кьван чIехи ва акъваз тийиз яд авахьдай къайдада кIвалахдай гъвечIи гидростанцийри, гуьнгуьна хутаз жедай энергиядин чешмеяр яз, гидроэнергетикадин асул артуханвилер ишлемишзава. Гьа са вахтунда абуруз чIехи ГЭС-риз хас тир чIуру таъсир авач.
Гьар са МГЭС типовой жуьрединди жеда ва адахъ 1 МВт-дин гужлувал ава. Им электропередачайрин линийривай агакьариз жезвай кьадардин гужлувал я”, — лагьана А.Алибегова.
Къейд ийин, проектар туькIуьрунин ва электростанцияр эцигунин кIвалах “ЭкоЭнерджи” ГК-дин хсуси такьатрихъ ва “къацу энергетика” виликди тухунин кардиз къуват гунин государстводин механизмайрин сергьятра аваз кьиле тухузва. Ахцегь райондин гъвечIи гидроэнергетика виликди тухунин кардиз 400 миллион манатдилай гзаф хсуси такьатар инвестицияр яз желбда.
Райондин патай лагьайтIа, МГЭС-ар эцигун патал лазим 1,6 гектардин кьадарда аваз чилин участокар чара авунин карда куьмек ганва. Гидростанцияр эцигиз 2024-йисуз башламишда.
Чи мухбир
