Яшайишдин фондунин Дагъустанда кардик квай отделенидин (СФР, Социальный фонд России) яшайишдин месэлайрай жаваб гудай контакт-центрадин сад тир нумра дегиш хьанва. ЦIийи нумра ихьтинди я: 8 800 200 03 39. Идакай РД-да авай СФР-дин пресс-къуллугъди хабар гузва.
Къейд ийин хьи, контакт-центрадин операторри агьалийриз пособийрин, пенсийрин, набутвал тайинарунин, рекье тунвай арзадин статус чирунин ва са жерге маса месэлайрин гьакъиндай суалриз жавабар гузва.
Ведомстводи гьакIни уьлкведин яшайишдин месэлайрай жаваб гудай контакт-центрадин сад тир нумрани рикIел хкизва: 8 800 100 00 01.
Вири уьлквединди тир контакт-центрадик агъадихъ галай ведомствояр кутунва: уьлкведин зегьметдин ва яшайишдин рекьяй хуьдай министерство, зегьметдин ва кIвалахдалди таъминарунин къуллугъ (Роструд), регионрин агьалияр яшайишдин рекьяй хуьдай идараяр, МСЭ-дин (медико-социальный экспертиза) идараяр.
Центрадин кьилин макьсад агьалияр уьлкведин, региондин ва муниципалитетдин дережада аваз абуруз талукь тир яшайишдин куьмекрин серенжемрикай хабардар авун я.
«Лезги газет»
