Дагъустандин чилин ва эменнидин алакъайрин министерстводихъ республикадин меркездин сергьятар дегишарунин месэла гьялдай фикир ава. Идакай “Дагъустандин экономика” телеграм-каналди хабар гузва.
И кIвалахдив ведомство Махачкъаладин патав гвай са шумуд муниципалитетдихъ галаз санал эгечIнава. Кьилди къачуртIа, вичикай ихтилат физвай и месэладал Махачкъала, Каспийск шегьеррин ва Къумторкъала, Къарабудахкент районрин администрациярни желбнава.
РикIел хкин, кьве йис идалай вилик Дагъустандин гьукуматди Махачкъаладин мулкарин агломерация пландик кутадай схема тестикьарнай. И къарардал асаслу яз, гила Махачкъала, Каспийск шегьеррин ва Къумторкъала, Къарабудахкент районрин мулкар и агломерациядик акатда.
«Лезги газет»
