Кьурагь райондин КIирийрин хуьр алатай асирра къванцин, ракьун, кIарасдин, гамарин устIарралди, КIири Бубадин гьунарралди машгьур хьанайтIа, ХХ, ХХI асирра ам ватанперес, игит рухвайри машгьурзава.
Ватандин ЧIехи дяведа цIудралди кIиривийри иштиракна, гзафбур орденриз, медалриз лайихлу хьана. Майор Эсед Салигьован кьегьалвал Советрин Союздин Игит лагьай тIвар гуналди къейдна.
Советрин девирда руьгьдик хцивал, уьтквемвал, дирибашвал квай кIириви жегьилри Ватан хуьнин, Ватандиз къуллугъ авунин — офицервилин пеше хкяна, военный академияр, вузар, училищеяр акьалтIарна. Уьлкведин Яракьлу Кьушунра капитанар, майорар, полковникар яз къуллугъна ва и баркаллу кар исятдани давамарзава. Рагьметлу генерал-майор Муьгьуьдин Къагьриманова уьлкведилай къецени (Ангола, Афгъанистан) государстводин тапшуругъар тирвал тамамарна.
Къе неинки хуьруьнвийри, гьакI районди, республикади Россиядин Игит Зейнудин Батмановал дамахзава.
Бубайрин, игитрин, кьегьал хуьруьнвийрин крарилай чешне къачуз, итимвилин, хвавилин буржи къагьриманвилелди кьилиз акъудзавай жегьилар хуьре гилани ава. Ватанди эвер гайила, Украинада кьиле тухузвай махсус серенжемдиз гуьгьуьллувилелди фенвай кIиривиярни ава. Абурукайни сад чна винидихъ тIвар кьунвай генерал-майор М.Къагьриманован хтул Гьамидов Медгьад я.
Россиядин армиядин сержантдин, взводдин командирдин чIехи буба Мегьамедшафи, дах Саидни устIарар я. Саида кьве йис я хуьруьн мискIин ремонт ийиз. Жемятдин куьмекни галаз ада ибадатханадал абур гъизва.
Украинада военный махсус серенжемдив эгечIдалди Медгьада Каспийскда авай частуна къуллугъзавай. Вакъиаяр икI элкъвейла, амни Ватандин итижар хуьз фена. Минер-сапердиз Донбассда кIвалах гзаф авай. Ада вичин юлдашарни галаз азаднавай шегьерар, хуьрер, мулкар миллетбазри кутунвай гзаф минайрикай, гранатрикай ва хъиткьиндай маса затIарикай михьна. Гьа са вахтунда, командирдин тапшуругъ тамамаруналди, душманди гьужумдай чкайрик минаяр кутуна.
Минер-сапер садра ягъалмиш жеда лугьуда. Гьавиляй Медгьад Гьамидов гьар сеферда дикъетлувал, мукъаятлувал хуьз алахъзава. Амма дяведин женгер кьиле физвай чкада им регьят кар туш. Нубатдин сеферда командирдин тапшуругъ кьилиз акъуддайла, Медгьадан женгинин юлдаш, чи ватанэгьли душмандин минадал хъиткьинна ва телеф хьана. Отпускдиз хтайла, Гьамидов Мегьарамдхуьруьн райондин ЦIийихуьруьз фена ва Сафаралиев Жамирзедин юлдашдин хизанрал кьил чIугуна.
Кьве гьафтеда хизанрин патав ял яна (Медгьадазни Алинатаз кьве велед ава, 7 йисавай Гуьзел ва 5 йисавай Хасан), аскер Донбассдиз хъфена. Ада вичин буржи намуслудаказ, викIегьвилелди кьилиз акъудзава. И кар адаз ганвай “Женгерин лайихлувилерай” медалдини успатзава.
Мирес Давид Гьамидова лугьузвайвал, Медгьада вичел тапшурмишзавай гьар са тапшуругъ вахтунда бегьемарзава ва гьужумдиз физвай чи частариз “къацу” рехъ ачухзава. Хизандин гьакъиндайни ам архайин я. Уьмуьрдин юлдашди хуьруьн аялрин бахчада кIвалахзава ва хизандин гьакъиндай хуьруьн, райондин талукь идарайри къайгъударвал чIугвазва.
И йикъара Медгьад мад хизандин патав хтанва. Хер хьайидалай гуьгъуьниз ам Астрахандин госпиталда хьана. Гила сагъламвал мягькемарзава.
Нариман Ибрагьимов
