13-мартдиз Дагъустандин Кьил Сергей Меликова эцигунрин хилен важиблу месэлайриз талукьарнавай совещание кьиле тухвана. Идакай “Лезги газетдиз” РД-дин Кьилин пресс-къуллугъди хабар гана.
Республикада, къанунрал амал тавуна, кьакьан мертебайрин кIвалер эцигунин месэла хцибурукай сад яз амукьзава. Совещанидал РД-дин Гьукуматдин Председатель Абдулмуслим Абдулмуслимова къейд авурвал, регионда эцигунрин къайдайриз талукь къанунар чIурнавай кьакьан мертебайрин 457 кIвалин гьакъиндай махсус ахтармишунар кьиле тухвана. Абурукай 408 кIвал Махачкъалада ава.
Сергей Меликован гафаралди, и кардин патахъай жавабдарвал къанунсуз эцигунриз рехъ гайи вири идарайрин, гьукумдин органрин хиве ава.
“Гьеле 2020-йисуз и месэладиз талукь къарар кьабулнай, къанунрал амал тавуна, эцигнавай кIвалер федеральный дережадин автономный идаради ахтармишнай. Амма чина масакIани хьун мумкин я: кьакьан гьавайрин тайин са кIвал эцигунал суддин къарардалди къадагъа эцигнаватIани, йифен вахтунда эцигунрин кIвалахар давам жезва. Жавабдар къуллугърин гуьзчивал гьинава? 2021-йисан сентябрдилай республикада, эцигунрин кIвалахар кьиле тухудайла, рехъ гузвай кимивилерин вилик пад кьадай ведомствойрин уртах десте кардик ква. Аник къанун-къайда хуьдай органрин векиларни ква. Жемиятдиз и дестеди кьиле тухванвай кIвалахдин нетижаяр къалурна кIанда”, — къейдна С.Меликова.
Ада гьакIни мукьвара Туьркиядани Сирияда хьайи залзалаяр ва, кьакьан гьавайрин кIвалерин проектар гьазурдайла, кимивилериз рехъ гун себеб яз, кьейибурун кьадар пара хьайиди рикIел хкана.
Агьмед Магьмудов
