СтIал Сулейманан районда акьалтзавай несил ватанпересвилин руьгьдаллаз тербияламишунин жигьетдай жуьреба-жуьре серенжемар кьиле тухун давам жезва. Кьилди къачуртIа, умуми образованидин идарайра алай девирдин игитрин экуь къаматриз бахшнавай пипIер (“Уголки памяти героев”) ачухнава. Школадиз къвезвай гьар са аялдиз стенддилай Ватан хуьдайбуру къалурзавай игитвилерихъ, халис ватанпересрихъ галаз таниш жедай мумкинвал ава.
ИкI Агъа СтIалрин-Къазмайрин школада и пIипI инаг акьалтIарай жегьил, “Жуьрэтлувиляй” ордендин сагьиб, Украинада кьиле физвай военный махсус серенжемда алатай йисуз игитвилелди телеф хьайи Руслан Абасоваз бахшнава. ПIипI ачухуниз талукьарнавай митингдал Агъа СтIалрин хуьруьн кавха Надир Эфендиева, хуьруьн администрациядин кьилин заместитель Малик Агьмедова, школадин директор Жабраил Асланова, хуьруьн депутатрин собранидин председатель Ибрагьим Ибрагьимова, Русланан буба Сейфедин Абасова, школадин коллективди иштиракна.
— Гьахъ, адалат, гьамиша вине кьуна ва хвена кIанзавай ерияр я. Бязи вахтара, гьайиф хьи, абур чандилай гъил къачуналдини хуьниз мажбур жезва. Гьахъвал хуьнин рекье чи школа акьалтIарай Руслан Абасовни игитвилелди телеф хьана. Ада акьалтзавай несилдиз викIегьвилин, жуьрэтлувилин акьалтI тийир чешне къалурзава. Чна чи хцел, школада кIелай аялдал, хуьруьнвидал датIана дамахда ва адан экуь къамат чи рикIера гьамиша амукьда, — къейдна Жабраил Асланова.
Р.Абасовахъ галаз са классда кIелай Надир Эфендиева чпин аял вахтар, школада Русланни ам дустар яз хьайиди, адан такабурлу къилихар, викIегьвал рикIел хкана.
Митингдин иштиракчийри школа акьалтIарай маса жегьилрини алай вахтунда Украинада кьиле физвай военный махсус серенжемда намуслудаказ ва лайихлудаказ чпин везифаяр кьилиз акъудзавайди — Ватандин итижар хуьзвайди ва милли хатасузвал таъминарзавайди къейдна. Абуру Ватан хуьзвай вири жегьилрихъ чандин сагъвал, хушбахтлувал хьун ва мукьвал вахтара абур гъалибвал гваз хтун алхишна.
Р.Рамалданова
